«Առաջին լրատվական»-ի զրուցակիցն է Հանրային խորհրդի անդամ Վազգեն Սաֆարյանը
– Պարոն Սաֆարյան, արդեն յոթ ամիս է, ինչ գործում է այս կառավարությունը: Ձեր կարծիքով՝ կառավարությունը կատարո՞ւմ է իր հռչակած սկզբունքները՝ հավասար խաղի կանոններ ստեղծելը, ստվերային տնտեսությունը կրճատելը և այլն:
– Յոթ ամիսը դեռ այդքան մեծ ժամանակահատված չէ, որ արդյունքներ ակնկալենք և կարծիք հայտնենք, բայց արվող քայլերը՝ սահմանամերձ գյուղերը ազատ տնտեսական գոտիներ դարձնելու մասին հայտարարությունները, դրական և վաղուց սպասված քայլ պիտի համարել: «Շրջանառության հարկի մասին» օրենքում կատարված փոփոխությունները դրական համարելով հանդերձ՝ այնտեղ պետք էր մատուցել տարբերակված մոտեցման գաղափարը: Այսինքն՝ ովքեր ցանկանում են փաստաթղթավորել իրենց շրջանառությունը, թող 1 տոկոս շրջանառության հարկ վճարեն, ովքեր դա չեն կարող կամ չեն ցանկանում անել, թող աշխատեն նախկին հարկման դաշտում: Պետք էր նաև մտցնել հաստատագրված վճարի գաղափարը, որովհետև հնարավոր է՝ տնտեսվարողը ցանկանար հաստատագրված հարկը վճարել և հարկային մարմինների հետ գործ չունենալ:
Այս իմաստով կառավարության այդ որոշումները կարելի է դրական գնահատել, բայց պիտի հաշվի առնել նաև հանրության դժգոհություններն ու առաջարկությունները:
– Հովիկ Աբրահամյանը հայտարարեց, որ փոքր ու միջին բիզնեսի շրջանառությունը փաստաթղթավորելու միջոցով իրենք ցանկանում են խոշոր բիզնեսին հարկային դաշտ բերել: Ձեր կարծիքով՝ ճի՞շտ է խոշորին հարկային դաշտ բերելու համար փոքր ու միջին բիզնեսին օգտագործելը:
– Ես կարծում եմ, որ տարիների ընթացքում փոքր ձեռնարկությունները որոշակի հարաբերությունների մեջ են մտել խոշոր տնտեսվարողների հետ: Եվ բացառված չէ, որ կա գործառույթ, երբ ապրանքը վերցնում են իրացնելու, հետո նոր վճարում են կատարում: Նման պարագայում ինչպե՞ս կարող են գնալ և ասել՝ փաստաթուղթ տվեք: Բացի դրանից՝ տարիների ընթացքում ձևավորված համագործակցության այս ավանդույթը խաթարելու խնդիր է առաջանում, որը մոտ չէ մեր ժողովրդի մենթալիտետին: Կարծում եմ, որ խոշոր ներմուծողները պետք է մաքսային համակարգում ճիշտ հաշվառվեն, ու մաքսազերծվեն նրանց բերած ապրանքները: Եվ այս դեպքում նման խնդիրը չի առաջանա:
– Այսինքն՝ մաքսային ծառայությո՞ւնը պետք է խոշոր ներկրողներին հարկային ու մաքսային դաշտ բերի, և ոչ թե դա անի փոքրերի միջոցով:
– Այո: Ես կարծում եմ՝ երբեմն պատահում է, որ մաքսակետերում ապրանքները ներմուծվում են խառը ապրանքների անվան տակ, և դրանց մեջ տարբեր ապրանքներ են մտնում: Պարզապես պետք է այստեղ որոշակի հստակություն մտցվի, և նման խնդրի առջև արդեն չեն կարող կանգնեցնել փոքր ու միջին բիզնեսին:
– Ինչո՞ւ կառավարությունը կամ հարկային-մաքսային ծառայությունները չեն փորձում խոշոր ներկրողին հենց մաքսազերծման ժամանակ բերել օրինական դաշտ, որ այդ նպատակով փոքր ու միջին բիզնեսին են օգտագործում:
– Խոշոր ներկրողներն այսօր որոշակի ազդեցություններ ունեն հանրային կյանքում, նրանցից շատերը պատգամավորներ են, մեծ հեղինակություն ու դիրք ունեն: Եվ հավանաբար դեռ նրանց հեշտությամբ չեն կարող հարկային դաշտ բերել, այլապես այլ ճանապարհով գնալը ոչ թե հարցի լուծում կապահովի, այլ ավելի կբարդացնի հանրային համերաշխության միտումները:
