Հոկտեմբերին, երբ Մինսկի խումբը դաշտային առաքելություն էր պատրաստվում իրականացնել Լեռնային Ղարաբաղի հարակից տարածքներում, հայկական կողմը նշում էր, թե դա կլինի միայն այն բանից հետո, երբ նման առաքելություն իրականացվի նաև Ադրբեջանի տարածքում գտնվող շրջաններում: Այդուամենայնիվ, հայկական կողմում առաքելությունը իրականացավ, այժմ էլ կա դրա վերաբերյալ զեկույց, իսկ ադրբեջանական կողմում` ոչ:
Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանի գնահատմամբ, Ադրբեջանն ամեն ինչ անելու է, որ թույլ չտա այդ տարածքներում դիտարկում արվի, քանզի երբ Մինսկի խումբը մտնի Հայաստանի կողմից մատնանշած տարածքներ, ապա ինքնին այս պրոբլեմը շատ ավելի բարդ է դառնում. «Առաջ է գալիս Ադրբեջանի կողմից օկուպացված տարածքների հարցը` դիվանագիտական ասպարեզ կմտնեն շատ կոնկրետ և կարևոր էլեմենտներ: Ադրբեջանն իրեն կխեղդի, բայց չի թողնի, որ դա լինի, բայց դա չի նշանակում, որ հայկական կողմը չպիտի պայքարի դրա համար»:
Իշխանական պատգամավորները այսօր էլ շարունակում են հայտարարել, թե պետք է Ադրբեջանի կողմից օկուպացված տարածքներում դիտարկում անել, ինչն, ըստ փորձագետի, հերթական «փուստ խոսակցություններն են, հարցը այս պահից ցրելու և հետո մտածելու համար»:
Ըստ Սարգսյանի` երբ փաստաթուղթը ներկայացվում է, դրա վերաբերյալ կողմերի ճանաչումն է պետք, և այսօր Հայաստանը պետք է հստակ ասի, որ մինչև Մինսկի խումբը չգնա Շահումյան, իրենք չեն ճանաչի հոկտեմբերին իրականացված դաշտային առաքելությունն ամփոփող փաստաթուղթը:
