Հայ ազգային կոնգրեսի ակտիվիստ Սամսոն Խաչատրյանի հարցով Սերժ Սարգսյանին դիմելու Գագիկ Ծառուկյանի քայլն անկասկած դժվար է տեղավորել միայն մարդասիրական նկատառումների կամ էլ պարզապես մարզաշխարհի ղեկավարի պաշտոնական պարտականությունների շրջանակում: Դա, անշուշտ, նաև քաղաքական քայլ է, որ փորձում է անել փետրվարի 17-ին կոալիցիոն նոր հուշագրից հետո լուսանցքում հայտնվելու ռեալ վտանգի տակ կանգած, եթե ոչ արդեն այդ վտանգի տակ մնացած «Բարգավաճ Հայաստան» կուսակցության առաջնորդը:
Բանն այն է, որ այսօր ներքաղաքական գործընթացները զարգանում են բավական հետաքրքիր դինամիկայով, որտեղ դաշտի առանցքային մասը գրավելու «բլից-կրիգով» հանդես են եկել մի կողմից իշխանությունը` Սերժ Սարգսյանը, մյուս կողմից Հայ ազգային կոնգրեսը: Ընդդիմադիր դաշտում այդ գործընթացին դիմագրավելու և սուբյեկտություն ձեռք բերելու համար քայլ կատարեց «Ժառանգությունը»: Կուսակցության առաջնորդը հացադուլ հայտարարեց, իսկ կուսակցությունն էլ փորձեց այդ հացադուլի քաղաքական կողմի գեներացիա ապահովել: Հաջող թե անհաջող՝ այլ խնդիր է:
Բայց ակնհայտ է, որ «Ժառանգությանն» այդպիսով այդուհանդերձ հաջողվեց սուբյեկտության որոշակի տարրեր ձեռք բերել և հայտնվել ակտիվ գործընթացների տիրույթուն, թեկուզ՝ ոչ կենտրոնում: Նույն խնդիրը լուծելու անհրաժեշտություն ունեն սուբյեկտության մյուս երկու հավակնորդները` ՀՅԴ-ն ու ԲՀԿ-ն: ՀՅԴ-ն այդ հարցը փորձում է լուծել «Քվեն ուժ է» շարժումով, սակայն իրականում այդ շարժումով ՀՅԴ-ն էլ ավելի ընդգծեց իր լուսանցքում լինելը, քանի որ դրա հանրային և քաղաքական ռեզոնանասը այնքան թույլ է, որ նույնիսկ լուրջ ընդդիմության չի արժանացել: «Բարգավաճ Հայաստան»-ի պարագայում իրավիճակն ակնհայտորեն ավելի բարդ էր, քանի որ, ստորագրելով կոալիցիոն հուշագիրը ՀՀԿ-ի հետ, ընդ որում՝ ինքնուրույնության և ինքնավարության բավական ինքնավստահ հայտերից հետո, կուսակցությունն ինքն իրեն ոչ միայն լուսանցքում, այլև փակուղում դրեց:
Եվ ահա այժմ Սամսոն Խաչատրյանի հարցը «Բարգավաճ Հայաստան»-ի համար թերևս դիտվում է որպես փակուղուց դուրս գալու միջոց, հնարավորություն, Կոնգրես-իշխանություն պարտիայի մեջ ներգրավվածություն ունենալու և այդպիսով լուսանցքից դուրս գալու ճանապարհ: Գագիկ Ծառուկյանը փաստորեն օգտագործում է այդ ճանապարհը: Հարցն այն է, թե արդյոք Սերժ Սարգսյանը նրան թույլ կտա այդ ճանապարհն անցնել, այսինքն՝ արդյոք Սերժ Սարգսյանին ձեռնտու կլինի՞ այժմ ԲՀԿ-ին որոշակի սուբյեկտություն հաղորդել, ինչը տեղի կունենա, եթե Սարգսյանը որոշի, որ Սամսոն Խաչատրյանին պետք է բաց թողնել:
