Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ ընթանում է Արա Հակոբյանի և Ռաֆայել Ավագյանի գործի դատական քննությունը:
55-ամյա Արա Հակոբյանը մեղադրվում է ՀՀ քրեական օրենսգրքի 202 հոդվածի 3-րդ մասի 2-րդ կետով այն բանի համար, որ իրացնելու նպատակով պատրաստել, պահել, ինչպես նաև 58-ամյա Ռաֆայել Ավագյանի հետ ՀՀ տարբեր մարզերում, Երևանում և ԼՂՀ-ում իրացրել է 3 միլիոն 61 հազար ՀՀ կեղծ դրամ:
Ռաֆայել Ավագյանը մեղադրվում է ՀՀ քրեական օրենսգրքի 202 հոդվածի 2-րդ մասի 2-րդ կետով 940 հազար կեղծ դրամ իրացնելու համար:
3 միլիոն 61 հազար դրամ կեղծ թղթադրամները, որպես իրեղեն ապացույց, կցված են քրեական գործին:
Քննչական փորձարարության ժամանակ Արա Հակոբյանը գունավոր լազերային տպիչով տեղում պատրաստել է 20 և 100 հազար դրամ անվանական արժեքներով թղթադրամներ, որոնք, ինչպես նաև լազերային տպիչը իրեղեն ապացույց են ճանաչվել ու կցվել քրեական գործին:
Արա Հակոբյանի և Ռաֆայել Ավագյանի խափանման միջոցը կալանավորումն է:
Գործով տուժողների շատ մեծ ցուցակի մեջ բացի ֆիզիկական անձանցից ընդգրկված են նաև հայաստանյան համարյա բոլոր բանկերը:
