2012 թվականի ձեռքբերումն այն էր, որ 1998 թվականի համեմատությամբ բանակում զինվորների սպանության քանակը պակասել է, քանզի այն ժամանակ զոհերն ավելի շատ էին: Բանակում կա նաև սննդի որակի բարձրացում, համազգեստի փոփոխություն, զինծառայողներն ապահովվել են քնապարկերով: Մեր շրջայցի ժամանակ 10.000 զինծառայողներ պարգևատրվել են ձեռքի ժամացույցներով, անցկացվել է համերգային ծրագիր՝ գրեթե բոլոր զորամասերում:
Զինվոր Հ/Կ համակարգող խորհրդի նախագահ Մարգարիտա Խաչատրյանը «Առաջին լրատվական»-ի հետ զրույցում խոսեց Հայոց բանակի 2012 թվականի ձեռքբերումների և 2013 թվականի ակնկալիքների մասին. «Ակնկալում ենք, որ 2013 թվականին ունենանք ավելի առողջ, ավելի հզոր բանակ, քանզի իմ երդումն ու նշանաբանը պայքարելն է, որպեսզի որդեկորույս մայրերի քանակը չավելանա: Ես Աստծուց խնդրում եմ, որ ոչ մի մայր այլևս բալա չկորցնի»:
Մ. Խաչատրյանը զինվորներին մաղթում է կանաչ ճանապարհ, կապույտ երկինք և անփորձանք ծառայություն. «Այն, ինչ կկամենա մայրը սեփական որդուն՝ ես մաղթում եմ մեր զինվորներին:
Շնորհավորում եմ նրանց Նոր տարին և Սուրբ Ծնունդը, և թող իմ մայրական օրհնությունը չպակասի: Մաղթում եմ ուժ, կորով, որպեսզի հայ ազգի աչքին միշտ բարձր մնա բանակ հասկացողությունը, քանզի բանակից թանկ մենք ոչինչ չունենք»:
