Խոսելով Ստամբուլում կայացած` Աֆղանստանի հարցերով տարածաշրջանային 4-րդ տնտեսական համաժողովում այդ երկրի հիմնախնդիրների մասին` Թուրքիայի արտաքին գործերի նախարար Ահմեդ Դավութօղլուն մասնավոր ընկերություններին եւ պետություններին կոչ է արել համագործակցել` Աֆղանստանում իրավիճակը բարելավելու համար: Այս մասին հաղորդում է Today’s Zaman-ը:
Դավութօղլուն նաեւ հայտնել է, որ Թուրքիայի, Պակիստանի եւ Աֆղանստանի միջեւ տեղի ունեցած եռակողմ հանդիպումների ժամանակ հիմնական եզրակացությունը եղել է այն, որ տնտեսական զարգացումը միայն խաղաղություն կբերի տարածաշրջան:
Խոսելով Աֆղանստանի մասին` Դավութօղլուն ասել է, որ երկիրը կարող է կարեւոր դեր խաղալ էներգակիրների տարանցիկ փոխադրման համար, քանի որ տարածաշրջանում նպաստավոր աշխարհագրական դիրք ունի: Գագաթնաժողովին են մասնակցել նաեւ Աֆղանստանի արտաքին գործերի նախարար Զալմայ Ռասուլը, Ադրբեջանի արտաքին գործերի նախարար Էլմար Մամեդյարովը, Իրանի փոխարտգործնախարար Ալի Ֆաթհուլլահին, ինչպես նաեւ պաշտոնատար անձինք Պակիստանից եւ Հնդկաստանից: