Ռուսաստանը Հայաստանին տրամադրում է այն զենքերի համարժեքները, որը վաճառում է Ադրբեջանին` «Առաջին լրատվական»-ի հետ զրույցում ասաց ՌԳԱ Արևելագիտության ինստիտուտի Կենտրոնական Ասիայի, Կովկասի և Ուրալ-Պովոլժիեի ուսումնասիրման կենտրոնի աշխատանքային խմբի համակարգող Ալեքսանդր Սկակովը:
Նա նշեց, որ Ռուսաստանը, զենք մատակարարելով և Հայաստանին, և Ադրբեջանին, փորձում է պահել Հայաստանի և Ադրբեջանի միջև առկա ռազմական հավասարակշռությունը, որի շրջանակում վաճառում է զենք Ադրբեջանին բիզնես նկատառումներով, իսկ Հայաստանին՝ անվտանգության: Քանի որ, նրա խոսքով, Ռուսաստանը զենք է վաճառում Ադրբեջանին, համապատասխանաբար ընդլայնում է նաև Հայաստանի ռազմական հնարավորությունները: Սկակովի փոխանցմամբ՝ եթե Հայաստանը չունի մի զինատեսակ, որը տրամադրվում է Ադրբեջանին, ապա Ռուսաստանը ջանում է Հայաստանի դեպքում այդ բացը լրացնել՝ տրամադրելով այնպիսի զինատեսակ, որը համարժեք է դրա ադրբեջանական տարբերակին:
«Այսինքն՝ Ռուսաստանը սրանով պահպանում է ուժերի հավասարակշռությունը Հայաստանի և Ադրբեջանի միջև»,- ասաց Սկակովը՝ հավելելով, որ Ռուսաստանը ջանում է ընդլայնել իր ռազմական ներկայությունը Հայաստանում նաև Հայաստանի հետ ունեցած ռազմաքաղաքական պայմանագրերի շրջանակում:
Հիշեցնենք, որ The Guardian-ի հոդվածում ասվում է, որ Մոսկվան պատրաստվում է ընդլայնել իր ռազմաօդային բազաները Հայաստանում և Ղրղըզստանում, ինչպես նաև ծրագրում է կործանիչների համար Արևելյան Բելառուսում 2016թ. ավիաբազաներ կառուցել: Այս մասին ասել է Ռուսաստանի ռազմաօդային ուժերի գլխավոր հրամանատար Վիկտոր Բոնդարյովը:
Հայաստանը, Ղրղըզստանը և Բելառուսն անվտանգության ազատ դաշինքի անդամներ են, որը գլխավորում է Ռուսաստանը, և հայտնի է որպես Հավաքական անվտանգության մասին պայմանագրի կազմակերպություն: Այն արագացրեց ՀՕՊ միասնական համակարգի ստեղծման տեմպերը, քանի որ ուկրաինական ճգնաժամը նոր խթան է տվել Արևմուտքի ուժային բլոկի՝ ՆԱՏՕ-ի զարգացման համար՝ ասվում է հոդվածում:
Դեռ մինչ Ուկրաինայում հակամարտությունը՝ Ռուսաստանը, նախագահ Վլադիմիր Պուտինի ղեկավարությամբ, զգալի ջանքեր է գործադրել, որպեսզի վերականգնի իր պատմական ռազմական ներկայությունն Արևելյան Եվրոպայում, Կենտրոնական Ասիայում, Արկտիկայում և այլ երկրներում: Այժմ բանակցություններ են տարվում Վիետնամի, Կուբայի, Վենեսուելայի և Նիկարագուայի հետ ռուսական ռազմավարական ռմբակոծիչների համար բազաների կառուցման վերաբերյալ՝ գրում է թերթը:
