Դերասանուհի Նատալի Փորթմանը գլխավորել է ամենաեկամտաբեր հոլիվուդյան աստղերի ցուցակը, որը ամեն տարի կազմում է Forbes ամսագիրը: Ըստ պարբերականի տվյալների՝ նրա մասնակցությամբ ֆիլմեր ստեղծողների վճարած յուրաքանչյուր մեկ դոլարը բերել է նրանց 42.7 դոլար:
Նման արդյունքի Փորթմանը կարողացել է հասնել հիմնականում «Սև կարապ» ֆիլմի կոմերցիոն հաջողությամբ, որտեղ նա գլխավոր դեր է խաղացել: «Սև կարապ»-ի արտադրությունը արժեցել է 13 մլն դոլար, իսկ վարձույթից ստացված գումարը կազմում է 329 մլն: Փորթմանի մասնակցությամբ 23 մլն դոլարի բյուջեով ևս մեկ՝ «Ավելին քան սեքս» ֆիլմը արտադրողներին բերել է 150 մլն դոլարի եկամուտ:
Ամենաեկամտաբեր աստղերի ցուցակում երկրորդ տեղը զբաղեցնում է դերասանուհի Քրիստիան Ստյուարտը: Նրան վճարված յուրաքանչյուր դոլարը բերել է 40.6 դոլար: Ավելի վաղ Forbes-ի կողմից Ստյուարտը ճանաչվել էր 2012 թ. ամենաբարձ վարձատրվող դերասանուհի: «Մթնշաղ»-ների վերջին երկու ֆիլմերի համար Ստյուարտին վճարած 25 մլն դոլարի հոնորարը հեշտությամբ վարձույթում վերածվել է 3.3 մլրդ դոլարի:
Երրորդ տեղը զբաղեցրել է Շայա Լաբեֆը, որը իրեն վճարած յուրաքանչյուր դոլարի դիմաց վերադարձնում է 35.8 դոլար: Լաբեֆի՝ այս վարկանիշում հայտնվելը ապահովել է «Տրանսֆորմերներ» ֆիլմը: Նա գլխավոր դեր է խաղացել չորս ֆիլմերից երեքում:
Չորրորդ հորիզոնականում հայտնվել է «Մթնշաղ»-ում Ստյուարտի գործընկեր Ռոբերտ Փաթինսոնը, որը ֆիլմի ստեղծողներին բերում է 31.7 դոլար յուրաքանչյուր 1 դոլարի դիմաց:
Հնգյակը եզրափակում է Դենիել Ռեդքլիֆֆը, որը հայտնվել է այս ցուցակում շնորհիվ Հարի Փոթերի արկածների մասին ֆիլմի: Այդ ֆիլմերի ընդհանուր եկամուտը կազմում է 7.7 մլրդ դոլար: Դերասանը յուրաքանչյուր մեկ դոլարի դիմաց բերել է 30.5 դոլար:
Վարկանիշային աղյուսակը կազմելիս հաշվի են առել վերջին երեք ֆիլմերի վարձույթից ստացված գումարի չափը և նրանց հոնորարների չափը:
Ավելի վաղ դեկտեմբերին Forbes-ը հրապարակել էր ամենաբարձր վարձատրվող աստղերի ցուցակը, որտեղ առաջին հորիզոնականում հայտնվել էր Էդդի Մերֆին:
