Վրաստանի ԱԳՆ ղեկավարի տեղակալ Դավիդ Զալկալիանին հայտարարել է, որ Մոսկվայի և Թբիլիսիի՝ Ռուսաստանի հետ հարաբերությունների կարգավորման գծով Վրաստանի վարչապետի հատուկ ներկայացուցիչ Զուրաբ Աբաշիձեի և ՌԴ ԱԳՆ ղեկավարի տեղակալ Գրիգորի Կարասինի հանդիպումների ձևաչափով բանակցությունները պետք է պահպանվեն՝ չնայած Ռուսաստանի և Աբխազիայի համագործակցության մասին պայմանագրի շուրջ տարաձայնություններին: Այս մասին հայտնում է «Նովոստի-Գրուզիան»:
Ռուսական ԶԼՄ-ների հաղորդմամբ՝ Աբխազիայի խորհրդարան է մտցվել ՌԴ-ում պատրաստված «Համագործակցության և ինտեգրման մասին» պայմանագիրը: Պայմանագրի 5-րդ հոդվածում նախատեսվում է «Ռուսաստանի և Աբխազիայի զինված ուժերի զորքերի միավորված խմբավորում ստեղծել (զինված հարձակման) ագրեսիան հետ մղելու համար և Աբխազիայի պետական սահմանի պահպանությանն ուղղված համատեղ գործողություններ»:
«Նովոստի-Գրուզիայի» հաղորդմամբ՝ այդ նորությունը երկրում բուռն արձագանք է գտել: Նախագահը խորհրդարանից պահանջել է շտապ դիրքորոշում մշակել և հայտնել է Անվտանգության խորհրդի ծրագրվող գումարման մասին, իսկ խորհրդարանում արտահայտվել են Աբաշիձեի և Կարասինի հանդիպումը չեղարկելու օգտին:
«Երբ կա հաղորդակցության այս ձևաչափը, կարծում եմ, անհրաժեշտ է օգտագործել այն: Ի՞նչ կլիներ, եթե վերջին պահին մեր իշխանությւոնները որոշեին, որ պրն Զուրաբը (Աբաշիձեն-խմբ.) չգնար (հանդիպմանը – խմբ.): Արդյոք դա ավելի մեծ լարվածություն չէ՞ր առաջացնի: Չէ՞ր արագանա բանակցային գործընթացը՝ ըստ դեռ չհամաձայնեցված այսպես կոչված պայմանագրի»- ասել է Զալկալիանին:
Վրաստանի հաշտեցման և քաղաքացիական իրավահավասարության հարցերով նախարար Պաատա Զաքարեիշվիլին ևս կարծում է, որ Աբաշիձե-Կարասին բանակցությունների ձևաչափը պետք է անպայման պահպանվի:
