Երեկ Իրանի արևմուտքում տեղի ունեցած 5.5 մագնիտուդ ուժգնությամբ երկրաշարժի հետևանքով տուժել է առնվազն 16 մարդ: Ավելի վաղ հաղորդվել էր 4 տուժածի մասին՝ փոխանցում է RIA Novosti-ն:
Երկրաշարժը տեղի էր ունեցել Իրաքի հետ սահմանից ոչ հեռու գտնվող Դիզֆուլ քաղաքից 59 կմ հյուսիս-արևմուտք: Օջախի խորությունը կազմել է 10 կմ:
Ինչպես ասվում է Իրանում Կարմիր խաչի միջազգային կազմակերպության հաղորդագրությունում, ամենից շատ տուժել են Աբդանան և Դեհլորան քաղաքները: Տուժել է 16 մարդ: Զոհերի մասին տեղեկություններ չկան: Կազմակերպության տվյալներով՝ մի քանի տներ են վնասվել, ընդհանուր վնասը գնահատվում է որպես նվազագույն:
Աբդանան քաղաքի իշխանությունները մտադիր են վրաններ և ժամանակավոր կացարաններ տրամադրել նրանց, որոնց տներն ամենից շատ են տուժել տարերային աղետի հետևանքով:
