Բրիտանական խոշոր առևտրական ցանցերը հայտարարել են, որ Սուրբ Ծննդյան երկրորդ օրը տոների կապակցությամբ կազմակերպված տոնավաճառը հաջող է անցել։ Լոնդոնում որոշ խանութներ բացվել էին առավոտյան ժամը 6-ին, անգամ մեքենավարների գործադուլը չի ազդել երթևեկության ծանրաբեռնվածության վրա:
Լոնդոնյան մետրոպոլիտենն աշխատում է շատ մեծ ուշացումներով՝ աշխատակիցների 24-ժամյա գործադուլի պատճառով։ Նրանք պահանջում են կրկնակի վարձատրություն՝ տոնական օրերին աշխատելու համար: Դեռ նախօրեին Transport for London ընկերությունը հաղորդել էր, որ ամենածանրաբեռնված ուղղություններով կաշխատեն հավելյալ ավտոբուսներ, որպեսզի մարդիկ կարողանան գնումներ կատարել:
«Մենք պատրաստ էինք գործադուլներին, և լրացուցիչ ավտոբուսներ են աշխատում մեզ համար: Գնորդների համար հեշտ չէ, բայց ես հույս ունեմ, որ կողմերը կնստեն բանակցությունների սեղանի շուրջ և կկարգավորեն հարցը»,- Sky News հեռուստաալիքին ասել է Լոնդոնի ռիթեյլերների New West End Company կազմակերպության ներկայացուցիչ Ջեյսոն Թիրելը:
Պրեմիում կարգի Selfridges հանրախանութը հաղորդել է, որ աշխատանքի առաջին ժամվա ընթացքում 1,5 մլն ֆունտ սթեռլինգի գնումներ են կատարվել:
