Ադրբեջանի արտգործնախարար Մամեդյարովը հոկտեմբերի վերջին Փարիզում նախատեսված Սարգսյան-Ալիև հանդիպմանն ընդառաջ հայտարարել է, որ Բաքուն պատրաստ է ձեռնամուխ լինել խաղաղության մեծ պայմանագրի շուրջ աշխատանքին և սպասում է հայկական կողմի արձագանքներին: Մամեդյարովը շատ ուշագրավ հայտարարություն է արել, ասելով, որ արդեն կան մի շարք առաջարկներ երկկողմ աշխատանքային խմբեր ձևավորելու և փորձագիտական մակարդակով տարածքների վերադարձի, փախստականների վերադարձի, ավերված ենթակառուցվածքների վերականգնման հարցերի շուրջ քննարկումներ ծավալելու համար: Ինչպիսի առաջարկների մասին է խոսում Մամեդյարովը՝ այնքան էլ պարզ չէ: Ովքեր են այդ առաջարկների հեղինակները՝ Մինսկի խմբի համանախագահնե՞րը, թե՞ Մինսկի խմբի առանձին որևէ անդամ: Ադրբեջանը վերջին շրջանում ինտենսիվ շփումների մեջ է ռուսական կողմի հետ:
Ռուսաստանն ու Ադրբեջանը մեծացնում են ռազմատեխնիկական համագործակցության ծավալները ևս մեկ միլիարդ դոլարով, ինչի արդյունքում 4 միլիարդ դոլարի համագործակցությունը կհասնի 5-ի: Միևնույն ժամանակ Ադրբեջանի համար Ռուսաստանը այսուհետ կպատրաստի սպայական կադրեր՝ Ադրբեջանի բանակում ծառայելու նպատակով: Այս ամենի ֆոնին Մամեդյարովի հայտարարությունները Փարիզի հանդիպումից առաջ իսկապես հետաքրքրական են: Շատերը կարծում են, որ Ռուսաստանը ԵՏՄ-ին Հայաստանի անդամակցումից հետո ձեռնամուխ է լինելու Ադրբեջանին ԵՏՄ բերելուն: Եվ այս կոնտեքստում չի բացառվում, որ ղարաբաղյան հակամարտության կարգավորման հարցում Ադրբեջանին ուղղված առաջարկները հենց Ռուսաստանի «բոնուսներն» են՝ ավանսային բոնուսները Բաքվին, թե վերջինս պատրաստակամություն հայտնի մտնել Եվրասիական միություն կամ առնվազն ակտիվորեն և բաց կերպով ներգրավվել այս միությանն անդամակցության գործընթացին: Այս դեպքում Ռուսաստանը, հավանաբար, Ադրբեջանին խոստանում է հայաստանյան զիջումներ ղարաբաղյան ուղղությամբ, ինչպիսին կլինի հենց նման աշխատանքային խմբերի ստեղծումը: Եվ այս կոնտեքստում մեկ այլ ուշագրավ դետալ ևս:
Ադրբեջանի նախարարի հայտարարություններին մի քանի շաբաթ առաջ նախորդել էր ռուսաստանցի իշխանամերձ քաղաքագետներից մեկի հարցազրույցը Բաքվի լրատվամիջոցներից մեկին, որում նա արտահայտել էր մի միտք, որ տեղյակ է հայ, ռուս և ադրբեջանցի դիվանագետների խմբի աշխատանքից, որոնք քննարկում են հակամարտության կարգավորման դետալներ: Իհարկե, հետագայում Մարկովը մեր լրատվամիջոցին տված հարցազրույցում պարզաբանել էր, թե ինքն այլ կերպ է ասել, թե կարող են լինել նման քննարկումներ, և հարմար ժամանակ է դրա համար, այնուհանդերձ սրանով այս «մտքի» շարունակությունը Ադրբեջանի արտգործնախարարի խոսքում պակաս ուշագրավ չի դառնում:
