Էներգակիրների` արեւելքից արեւմուտք տեղափոխման կովկասյան երթուղին ավելի շատ է սկսել հետաքրքրել ինչպես փորձագետներին, այնպես էլ նավթի եւ գազի գնորդներին: Օրերս Ղազախստանի նախագահ Նուրսուլթան Նազարբաեւը խոսել է ղազախական նավթը Կովկասով ԵՄ տեղափոխման մասին ` շրջանցելով Բոսֆորն ու Դարդանելը:
Հաշվի առնելով արդեն գոյություն ունեցող պայմանավորվածությունները` կովկասյան երթուղին ստանում է ավելի կարեւոր նշանակություն: Թերթը գրում է, որ Ադրբեջանը, Վրաստանն ու Ռումինիան արդեն ստորագրել են համապատասխան փաստաթղթեր, որով ադրբեջանական հեղուկացված գազը տեղափոխվելու է Ռումինիա:
Ուկրաինա կատարած այցի ժամանակ Իլհամ Ալիեւն իր ուկրաինացի գործընկերոջ հետ պայմանավորվել է ավելացնել գազի առաքումներն Ուկրաինա: Համատեղ ասուլիսի ժամանակ երկու երկրների ղեկավարները նշել են, որ սկսել են մշակել ռազմավարական համագործակցության պայմանագիրը, որը նախատեսում է դեպի Ուկրաինա ադրբեջանական էներգակիրների արտահանման ծավալների զգալի աճ:
Ինչպես «НГ»-ին հաղորդել են Ադրբեջանի նավթային պետական ընկերությունից, 2011-2014թթ. Ադրբեջանում կարդյունահանվի 223 մլն տոննա նավթ եւ 120 մլրդ խորանարդ մետր գազ: Այս տարի նավթի արդյունահանումը կկազմի 51,6 մլն տոննա, 2014թ.-ին` 62,4 մլն: Գազի արդյունահանումը կկազմի 29 եւ 32 մլրդ խորանարդ մետր` համապատասխանաբար:
Փորձագետների կարծիքով, ծավալների մեծացումը կապված է նրա հետ, որ Ադրբեջանը գտել է իր էներգակիրների գնորդ, ինչպես նաեւ ձգտում է դառնալ տրանզիտային երկիր` Կասպից ծովի արեւելյան ափից նավթի տեղափոխման համար: Այն, որ այս հարցը քննարկվում է պրակտիկ տեսանկյունից, վկայում են Նուրսուլթան Նազարբաեւի եւ Իլհամ Ալիեւի միաժամանակյա հայտարարությունները:
Նուրսուլթան Նազարբաեւն ասել է, որ ղազախական կողմը հետաքրքրված է Բոսֆորի եւ Դարդանելի շրջանցման ծրագրերի մեջ: «Մենք չենք բացառում այդ երթուղիների օգտագործման հնարավորությունը` Եվրոպա նավթ առաքելու համար, սակայն վատ չէր լինի բացել նավթի տեղափոխման նոր երթուղի կովկասյան միջանցքով, այսինքն` Ադրբեջանից Վրաստան, ապա Սեւ ծովով հեծանավերով դեպի Ռումինիա: Այս դեպքում Կոնստանցա-Տրիեստ ծրագիրը մեզ պետք կգա», – ասել է Ղազախստանի նախագահը:
Ղազախական ԶԼՄ-ները հայտնում են, որ ղազախական կողմը շահագրգռված է այս ծրագրի մեջ, քանի որ նոր հանքավայրերի շահագործման արդյունքում Ղազախստանն ունենալու է լրացուցիչ 50 մլն տոննա նավ, որն անհրաժեշտ է արտահանել: