Գյումրու տեխնոպարկի հիմնական շենքի շինարարությունը կավարտվի 2013 թ-ի վերջին: Գրեթե նույն ժամանակ Գյումրիում կստեղծվի «Դ-Լինկ» ընկերության հետազոտությունների և թեստավորման կենտրոն: Ծրագրի արժեքը կազմում է 8.5 մլն ԱՄՆ դոլար, որից 1 մլն ԱՄՆ դոլարը կտրամադրվի թեստավորման լաբորատորիայի հիմնադրմանը: Կենտրոնը հնարավորություն կընձեռի մշակել և թեստավորել ցանցային և հեռահաղորդակցության տեխնոլոգիաների ոլորտներում միջազգային շուկայի պահանջներին համապատասխան նորարարական արտադրանք:
Էկոնոմիկայի նախարար Տիգրան Դավթյանն այսօր ասուլիսում տեղեկացրեց, որ Գյումրու տեխնոլոգիական կենտրոնի գործարկման հաջողված փորձի հիման վրա նախատեսվում է տեխնոլոգիական կենտրոն ստեղծել նաև Լոռու մարզի Վանաձոր քաղաքում: Արդեն իսկ ընտրվել է կենտրոնի տեղակայման տարածքը, ինչպես նաև բանակցություններ են տարվել Համաշխարհային բանկի հետ` «Էլեկտրոնային հասարակության և մրցունակության համար նորարարությանե ծրագրի շրջանակում կենտրոնի վերանորոգումն իրականացնելու ուղղությամբ:
Անցնող տարում ՏՏ ոլորտում կարևորագույն իրադարձությունների շարքին են դասվում նաև սեպտեմբերին մեկնարկած «Համակարգիչ բոլորի համար» ծրագրի հիմնական փուլը, որում ներգրավված են ավելի մեծ թվով վաճառակետեր, մասնակից բանկեր և արտադրողներ (HP, DELL և ASUS Technology PTE Ltd), ԱՄՆ-ի Սիլիկոնյան հոտվում` Սթենֆորդի համալսարանում տեղի ունեցած «ԱրմԹեք» համաժողովը, որի ժամանակ
ՀՀ կառավարության և «Ինթել» ընկերության միջև կնքվեց ՀՀ-ում գիտահետազոտական կենտրոն հիմնելու մասին փոխըմբռնման հուշագիրը, իսկ «Կորպորասիոն Ամերիկա» ընկերության և ՀՀ կառավարության միջև ստորագրվեց Հայաստանում չիպերի գործարան հիմնելու մասին հուշագիրը, դեկտեմբերին ստորագրվեց Հայաստանում առաջին վենչուրային հիմնադրամի ստեղծման մասին փոխըմբռման հուշագիրը և այլն:
2012 թվականի սեպտեմբերին մեկնարկել են նաև Ռադիոիզոտոպների արտադրության կենտրոնի շենքի շինարարական աշխատանքները: Կենտրոնի շինարարության ավարտից հետո այնտեղ կտեղադրվի բելգիական ընկերությունից ձեռքբերվելիք ռադիոիզոտոպների արտադրության համալիրը` բաղկացած «Ցիկլոն-18» 18 ՄԷՎ հզորությամբ ցիկլոտրոնից և ինտեգրված բարձր տեխնոլոգիական սարքավորումներից: Ծրագրի ամբողջական գործարկմամբ Հայաստանում կառաջարկվեն քաղցկեղի ախտորոշման և բուժման բարձրակարգ ծառայություններ:
