Այս տարվա հոկտեմբերին ՀՀ կառավարության որոշմամբ ԱԳՆ շենքը (կառավարական 2-րդ մասնաշենք) ուղիղ ձևով վաճառվեց արգենտինահայ գործարար Էդուարդո Էռնեկյանի «Տանգո» ընկերությանը, ինչը վրդովեցրել էր հասարակությանը, և արդարացի հարց էր առաջ քաշվում՝ իսկ Բաղրամյան 26-ի շենքը ե՞րբ է վաճառվելու: Հայտարարվեց գործարքի գինը՝ մոտ 52 մլն դոլար: Միաժամանակ պայման էր դրվել, որ Վազգեն Սարգսյան փողոցի վրա` արդարադատության նախարարության շենքի նախկին տեղում, պետք է կառուցվի նոր շենք, որը նախատեսվում է շահագործման հանձնել 2015թ. ամռանը։ Իսկ ԱԳՆ շենքը կծառայի որպես 5 աստղանի հյուրանոց։
Մինչդեռ ՀՀ կառավարության վաղվա նիստի օրակարգում ընդգրկված է նախագիծ, որով նախատեսվում է կառավարական 2-րդ մասնաշենքը դնել աճուրդի: ՀՀ կառավարությունից «Առաջին լրատվական»-ին հայտնեցին, որ Էդուարդո Էռնեկյանը պարզապես հրաժարվել է գործարքից:
Սակայն «Առաջին լրատվական»-ի հավաստի տեղեկություններով՝ Էռնեկյանը չի մտքափոխվել, և կառավարության հետ պայմանավորվածությունն ուժի մեջ է, և, ըստ ամենայնի, աճուրդում հաղթող գնորդը հենց ինքն է լինելու, թեև ձևականությունները պահպանելու համար կհայտարարվի, որ աճուրդին կարող է մասնակցել ցանկացած ոք:
Փաստորեն, սա վարչապետ Տիգրան Սարգսյանի բեմադրած թատրոնն է՝ պետգույքի կառավարման վարչության պետ Արման Սահակյանի գլխավոր դերակատարմամբ:
