Երևանի քաղաքապետ Կարեն Կարապետյանի նախաձեռնությամբ վերջերս գործարկված «Օգնիր դպրոցիդ» էլեկտրոնային կայքի ստեղծումը քայլ է ուղղված ապագա սերնդի ճիշտ դաստիարակմանը, բարեկարգ կրթօջախներ ունենալուն, դպրոցի դերը հասարակության շրջանում էլ ավելի բարձրացնելուն և որակյալ կրթություն ապահովելուն:
Կայքի գործարկման մասին իրազեկման և հնարավորին լայն տարածման հարցեր են քննարկվել Երևանի քաղաքապետի տեղակալ Վանո Վարդանյանի մոտ տեղի ունեցած աշխատանքային խորհրդակցության ժամանակ:
Էլեկտրոնային կայքի մասին իրազեկման և դրա տարածման մասով, քննարկման ընթացքում կարևորվել է ակտիվ համագործակցությունը պետական և համայնքային կառույցների, բարերարների, գործարարների, դեսպանատների, հայկական մեծ սփյուռքի հետ: Հանգանակություններն ու նվիրատվությունները կամավոր սկզբունքով են, օժանդակությունն` ուղղված, ինչպես հարազատ, այնպես էլ մայրաքաղաքի ցանկացած դպրոցի բարեկեցությանը:
Քաղաքապետի տեղակալ Վանո Վարդանյանը նաև նկատել է, որ իրազեկման շրջանակում պետք է հատուկ շեշտադրել Երևանի քաղաքապետի հանձնարարականը, համաձայն որի, բոլոր պատասխանատու կառույցները պետք է վերահսկեն կամավոր կատարված հանգանակություններից գոյացած միջոցների և դրանց տնօրինման թափանցիկության ապահովումը:
Հաշվի առնելով, որ դպրոցներն այսօր բազմաթիվ կարիքներ ունեն, «Օգնիր դպրոցիդ» կայքի միջոցով դպրոցներին ուղղված ցանկացած կամավոր վճարում կարող է զգալի օգուտ տալ կրթօջախների խնդիրների լուծմանը: Բացի այդ, կայքի ստեղծումը ևս մեկ քայլ է ուղղված դպրոցներում դրամահավաքության արատավոր երևույթի մերժմանը:
Երևանի քաղաքապետարան