«Գիտությունն ու տեխնոլոգիան զարգանում են, կյանքը տեղում չի մնում: Նոր սերնդի ատոմակայաններ կառուցելիս հաշվի են առնվում անցած փորձը և գործողների սխալները»,- «Առաջին լրատվական»-ի հետ զրույցում այսօր ասաց ԱԺ ՀՅԴ խմբակցության պատգամավոր Արա Նռանյանը` պատասխանելով այն հարցին, թե որքանո՞վ անվտանգ կլինի մեր նոր ատոմակայանը, որը փոխարինելու է գործողին:
«Հայկական նոր ատոմակայանը լինելու է նոր սերնդի ատոմակայան, որն իր անվտանգության մակարդակով անհամեմատ գերազանցելու է տարիներ առաջ կառուցված և ներկայումս շահագործվող ատոմակայաններին:
Նման կառույցի դերն ու նշանակությունը դժվար է գերագնահատել Հայաստանի հետագա զարգացման և հզորացման գործում: Հիշեցնեմ, որ միջազգային հանրությունը ճիգեր է գործադրում Իրանում ատոմային էներգետիկայի զարգացմանը խոչընդոտելու համար, Թուրքիան ամեն գնով փորձում է Ռուսաստանի Դաշնությանը ներգրավել իրենց երկրի առաջին ատոմակայանի կառուցմանը, իսկ Վրաստանն ու Ադրբեջանը պարզապես կերազեին ունենալ իրենց երկրում այդպիսի հզոր հաստատություն, ինչպիսին է ատոմակայանը:
Այսինքն՝ տարածաշրջանում որևէ պետություն առայժմ չի տիրապետում այդպիսի հզորության, իսկ ոմանք այդպես էլ երբեք այն չեն ունենա: ԱԷԿ-ի շահագործումը նոր մակարդակի վրա է բարձրացնում երկրի հեղինակությունն ու անվտանգության մակարդակը»,- ասաց Ա. Նռանյանը: Նրա խոսքով` հասկանալի է, որ «Ֆուկուսիմա-1» ատոմակայանի ներկայիս ճգնաժամը կրկին ակտիվացնելու է խոսակցությունները թե՛ երկրի ներսում, թե՛ հարևանների մեջ:
«Առաջին դեպքում մենք ունենալու ենք զգացական մոտեցում` մեր քաղաքացիների մտահոգությունն ու անհանգստությունը հասկանալի է: Երկրորդի դեպքում հստակ է` Ադրբեջանը, Վրաստանը, Թուրքիան փորձելու են խեղդել Հայաստանի նոր ատոմակայանի կառուցման նախագիծը միայն մեկ պարզ պատճառով` նրանք չունեն ատոմակայան և, երազելով ունենալ նման կառույց, կցանկանան զրկել Հայաստանը այդպիսի գործոնից:
Եվ պետք է հստակ գիտակցել, որ առանց ատոմակայանի, առանց մեր էներգետիկ անվտանգության խնդրի լուծման, մեր հարևանները շատ արագ կխեղդեն մեր անկախ պետությունը:
Հարգելով մտավախություն ունեցող մեր հայրենակիցներին, ուզում եմ հիշեցնել մեր ոչ այնքան վաղ անցյալը` մի անգամ արդեն փակել էինք ատոմակայանը…»,- ասաց ԱԺ պատգամավորը։