ԱՄՆ Նյու Յորք նահանգի Վեբսթեր քաղաքում մեկ օր առաջ հրշեջներին սպանած հանցագործի այրված տան տեղում կնոջ մարմին է հայտնաբերվել: Հավանաբար, մարմինը մարդասպանի 67-ամյա քրոջն է, որը նրա հետ նույն տանն է ապրել,- հայտնել են ոստիկանության ներկայացուցիչները:
Դեկտեմբերի 24-ի վաղ առավոտյան 62-ամյա Ուիլյամ Սփենգլերն այրել է Օնտարիո կղզու ափին գտնվող իր տունը, հետո հրացանով կրակահերթ է բացել հրդեհը մարելու եկած հրշեջների ուղղությամբ:
Որպես հետևանք՝ երկու հրշեջ սպանվել է, ևս երկուսը՝ վնասվածքներ ստացել: Տուժել է նաև հանցագործի հետ փոխհրաձգությանը մասնակցած ոստիկանը:
Սփենգլերի տունը հիմնահատակ այրվել է,- փոխանցում է ITAR-TASS-ը: Կրակը տարածվել է նաև մոտակա տների վրա՝ ամբողջովին ոչնչացնելով դրանք: Ոստիկանների խոսքերով՝ Սփենգլերը հատուկ է այրել իր տունը՝ որպեսզի հրշեջներին թակարդը գցի:
Հանցագործությունը կատարելուց հետո նա ինքնասպան է եղել: Հետաքննության տվյալներով՝ Սփենգլերը մահվանից առաջ գրություն է թողել, որում հայտարարել է, թե «ուզում է մինչև վերջ այրել հնարավորինս շատ տներ և զբաղվել իր սիրած գործով՝ մարդ սպանել»:
Հանցագործության պատճառները ճշտված չեն: Ավելի վաղ Սփենգլերը բանտում անցկացրել է 17 տարի՝ 1980-ին իր տատիկի սպանության համար:
