ԴԱԻՇ խմբավորման զինյալները ստեղծում են ծխի սյուներ՝ շփոթեցնելու և թյուրիմացության մեջ գցելու միջազգային կոալիցիայի ինքնաթիռներին, որոնք ավիահարվածներ են հասցնում նրանց դիրքերին: Այս մասին հայտարարել է Իրաքի ՊՆ ներկայացուցիչ Մուհամմադ Ալ-Ասկարին՝ փոխանցում է ITAR-TASS-ը:
Նրա խոսքով՝ դրա համար նրանք վառում են մեծ քանակությամբ օգտագործված անվադողեր: Նա կարծում է, որ ակնհայտորեն այդ գաղափարը ԴԱԻՇ-ը ստացել է իրաքյան բանակի նախկին սպաներից, քանի որ այն հիշեցնում է Սադամ Հուսեյնի կողմից կիրառված մարտավարություններից մեկը: Նա հիշեցրել է, որ Հուսեյնի զորքերը վառում էին նավթային հորատանցքերը, որոնք վառվում էին ամիսներ շարունակ, իսկ ծուխը տարածվում էր հարևան երկրներում:
«Այդ հնարքն այն ժամանակ չաշխատեց, այն չխանգարեց միջազգային կոալիցիայի օդանավերին ոչնչացնել Իրաքի ռազմական մեքենան»,- նշել է նա՝ խոսելով 2003-ին Իրաք ամերիկյան ներխուժման մասին:
Ալ-Ասկարին այդ մեթոդները համարում է անօգուտ, քանի որ ժամանակակից օդանավերը թիրախները գտնում են ռադարների միջոցով, և նրանց ծխով շփոթեցնելը գրեթե անհնար է:
