ՀՀ առողջապահության նախարար Դերենիկ Դումանյանն ընդունել է «Բժիշկներ առանց սահմանների» միության հայաստանյան մասնաճյուղի առաքելության ղեկավար Աննաբել Ջերիբիին և բժշկական համակարգող Սայֆուլ Քայյումին: Այս մասին «Առաջին լրատվական»-ին հայտնում են ՀՀ առողջապահության նախարարության լրատվական ծառայությունից
Ողջունելով հյուրերին` նախարարը նշել է, որ միության հետ համագործակցության երկար ճանապարհ են անցել տուբերկուլոզի հայտնաբերման, ախտորոշման և բուժման գործում: Խնդիր, որ մշտական ուշադրություն և նորանոր լուծումներ է պահանջում:
Աննաբել Ջերիրբին ներկայացրել է կազմակերպության առաքելությունը, ձեռքբերումները և նոր նախաձեռնությունները:
Մասնավորապես` նա նշեց, որ ռեգուլյար և դեղորայքակայուն տուբերկուլոզի բուժման գործընթացն իրականացվում է ՀՀ առողջապահության նախարարության և ՀՀ ԱՆ Տուբերկուլոզի դեմ պայքարի ազգային գրասենյակի հետ համատեղ և արդյունավետ: 2005 մինչև օրս Հայաստանում ԲԱՍ-ի կողմից բուժօգնություն ստացած դեղորայքակայուն տուբերկուլոզով հիվանդների ընդհանուր թիվը կազմել է 972: Նրանցից 225-ը դեռևս բուժման մեջ են: Նա հույս հայտնեց, որ համագործակցությունը շարունակական կլինի և կընդլայնվի:
Առաքելության ղեկավարը նախարարին տեղեկացրել է, որ 2013 թվականի փետրվարին նախատեսում են կազմակերպել վիրաբույժներից բաղկացած թիմի առաջին այցը Հայաստան: Նա մանրամասնեց, որ մասնագետները Աբովյանի հակատուբերկուլյոզային դիսպանսերում կկատարեն վիրահատություններ, միաժամանակ տեղի մասնագետների հետ կանցկացնեն վերապատրաստման դասընթացներ:
Դերենիկ Դումանյանը ողջունել է առաջարկը և հավելել, որ տուբերկուլոզով հիվանդների բուժմանը միտված ցանկացած նախաձեռնություն կարևոր է հիվանդության կանխարգելման առումով:
Կողմերը քննարկել են դեղերի հատկացմանը, վիրաբուժական սարքերի ներկրմանը, մարզերում ծրագրի ընդլայնմանը և համագործակցությանն առնչվող մի շարք այլ հարցեր:
