Հյուսիսային Իրաքի քրդական ինքնավարությունը դադարեցրել է նավթ մատակարարել կենտրոնական կառավարությանը: Այս մասին հաղորդում է Associated Press-ը՝ վկայակոչելով Քրդստանի ազգային ռեսուրսների նախարարության ներկայացուցիչ Ալի Հուսեյն Բալոյին:
Նրա խոսքերով՝ Իրաքի կառավարությունը տարածաշրջանում աշխատող ընկերություններին ամբողջությամբ չի վճարել մատակարարված նավթի դիմաց: Բաղդադը պետք է վճարեր շուրջ 848 միլիոն դոլար, սակայն մարել է միայն 550 միլիոն դոլարի պարտք:
Իրաքի կառավարությունն իր հերթին հայտարարել է, որ Քրդստանի ընկերությունները նավթ մատակարարել են ոչ ամբողջական ծավալով և այդ կապակցությամբ վճարումները հետաձգվում են: Ըստ Բաղդադի և ինքնավարության միջև կնքված համաձայնագրի Քրդստանը օրական պետք է մատակարարի 200 հազար բարել նավթ:
2011 թ. Իրաքի կենտրոնական կառավարության և Հյուսիսային Իրաքի քրդական ինքնավարության իշխանությունների միջև կնքված պայմանագրի համաձայն՝ Քրդստանը նավթի արտահանում իրականացնում է միայն Բաղդադի միջոցով, իսկ ստացված եկամուտը կողմերը կիսում են:
Հիշեցնենք, որ 2012 թ. ապրիլին Քրդստանը դադարեցրել էր նավթ մատակարարել կենտրոնական կառավարությանը: Այդ ժամանակ Բաղդադի պարտքը կազմել է շուրջ 560 միլիոն դոլար:
Իրաքի կենտրոնական կառավարությունը հակամարտում է նաև Քրդստանում աշխատող միջազգային ընկերությունների հետ: Բաղդադը պնդում է, որ նավթի արդյունահանման մասին բոլոր պայմանագրերը պետք է կնքվեն մայրաքաղաքի միջոցով, այն դեպքում, երբ շատ ընկերություններ պայմանավորվածություններ են ձեռք բերում ինքնավարության հետ:
