Ռուսական «Վզգլյադ» թերթի փոխանցմամբ՝ Աջարիայի Կեդա շրջանից պատգամավոր ընտրված Յակով (Յաշա) Շերվաշիձեն լքում է նախագահ Միխեիլ Սաակաշվիլիի «Միասնական ազգային շարժում» կուսակցությունը: Օրեր առաջ նման կերպ վարվել էր Ամբրոլաուրիից ընտրված պատգամավոր Գոչա Էնուկիձեն:
Այս երկու պատգամավորներն էլ 2008-2012 թվականներին խորհրդարանում ներկայացրել են Սաակաշվիլիի կուսակցությունը: Ենթադրվում է, որ օրեր անց այդ կուսակցությունը լքելու է ևս չորս պատգամավոր, ինչից հետո այդ վեց անձինք կստեղծեն առանձին խմբակցություն:
Հիշեցնենք, որ հոկտեմբերի 1-ին անցկացված խորհրդարանական ընտրություններից հետո «Վրացական երազանքը» խորհրդարանում ստացել է 85 մանդատ, իսկ «Միասնական ազգային շարժում» կուսակցությունը՝ 65 մանդատ: Այս կուսակցությունից արդեն իսկ դուրս է եկել 6 պատգամավոր, որոնք ստեղծել են իրենց խմբակցությունը:
Այս կամ այն օրինագծերի վրա Սաակաշվիլիի հնարավոր վետոյի հաղթահարման համար «Վրացական երազանքից» պահանջվում է 90 քվե՝ 150 պատգամավորից, ինչը նա փաստացիորեն ունի արդեն: «Վրացական երազանքը» քայլեր է ձեռնարկում խորհրդարանում սահմանադրական մեծամասնության (100 քվե) հասնելու համար:
