2008թ. այս օրը ՀՀ նախագահ Սերժ Սարգսյանը հրամանագիր ստորագրեց մեծանուն երգիչ, հասարակական գործիչ, Հայաստանի Հանրապետության Ազգային հերոս Շառլ Ազնավուրին և նրա իմպրեսարիո, Մովսես Խորենացու մեդալակիր Լևոն Սայանին Հայաստանի Հանրապետության քաղաքացիություն շնորհելու մասին:
Ազնավուրը ծնվել է 1924թ. փետրվարի 22-ին Փարիզում, հայ գաղթականներ Միշա և Քնար Ազնավուրյանների ընտանիքում։ Առաջին երգը՝ «Ես հարբած եմ» (1944), Ժորժ Ուլմյերի կատարմամբ, արժանացել է «Տարվա ձայնապնակ» մրցանակին, սակայն Ազնավուր-կատարողին հանդիսատեսը երկար ժամանակ չի ընդունել։ Համաշխարհային հռչակ է ստացել 1956թ. Փարիզի «Օլիմպիա» դահլիճում հաջող ելույթից հետո։
Շուրջ 800 երգի հեղինակ է: Ամերիկյան «Թայմ» հանդեսի հարցման համաձայն` Ազնավուրը ճանաչվել է «Դարի արվեստագետ»՝ 149 հազար ձայնով։ Արժանացել է Հայաստանի և Ֆրանսիայի բարձրագույն պետական պարգևներին, «Պատվո սեզարի» (1997)։ Հայաստանի մշտական դեսպանն է ՅՈւՆԵՍԿՕ-ում։
2009թ. մայիսի 4-ից Ժնևի ՄԱԿ-ի գրասենյակում և այլ միջազգային կազմակերպություններում ՀՀ մշտական ներկայացուցիչն է, 2009թ. մայիսի 5-ից` Շվեյցարիայի Համադաշնությունում Հայաստանի Հանրապետության արտակարգ և լիազոր դեսպան:
