Որոշ աղբյուրների փոխանցմամբ, Գյումրիի կենտրոնական հրապարակում օրերս պիտի իրար հետ հաշիվներ պարզեին ԱԺ պատգամավոր Սամվել Բալասանյանի ու Գյումրիի քաղաքապետ Վարդան Ղուկասյանի որդիները, և գյումրեցիները մտավախություն են ունեցել, որ օրը ցերեկով հերթական փոխհրաձգություն կլիներ, սակայն միջադեպը կանխել է Շիրակի մարզպետ Աշոտ Գիզիրյանը: Նախատեսված հանդիպումից ընդամենը 10 րոպե առաջ բանակցելու նպատակով նա մարզպետարան է հրավիրել երկու կողմերին: Ուստիև զրուցեցինք Շիրակի մարզպետ Աշոտ Գիզիրյանի հետ` պարզելու, թե ինչպե՞ս է նրան հաջողվել կանխել սպասվելիք միջադեպը:
– Պարոն Գիզիրյան, Ձեզ ինչպե՞ս հաջողվեց կանխել միջադեպը և հաշտեցնել կողմերին:
– Նման բան չի եղել, որ կողմերը ցանկանան Գյումրիի կենտրոնական հրապարակում հաշիվներ պարզել, և ես նրանց հրավիրեմ ինձ մոտ ու փորձեմ հաշտեցնել: Ավելին, որքանով ես եմ տեղեկացված, Վարդան Ղուկասյանի որդին գտնվում է արտասահմանում: Նույնիսկ արդեն հայտարարություն եմ տարածել, որ նման բան չկա և չի եղել: Կամ ես ինչո՞ւ նրանց պետք է հրավիրեի ինձ մոտ: Նման բան չկա և չի կարող լինել: Ավելին` այդ օրը նախագահը այցելել էր Շիրակի մարզ, և ես նախագահի հետ եմ եղել: Հետևաբար այսքանից ավել այդ թեմայի շուրջ զրուցելը նպատակահարմար չեմ համարում:
– Եթե այդ ամենը իրականությանը չի համապատասխանում, ապա որտեղի՞ց է նման տեղեկության արտահոսքը:
– Ես ի՞նչ իմանամ: Դա արդեն ինֆորմացիա տարածողից պետք է հետաքրքրվեք, թե ինչ նպատակներ է հետապնդում` նման ինֆորմացիա տարածելով: Ես միայն կարող եմ վստահեցնել, որ նման բան չի եղել, հետևաբար ինֆորմացիան իրականությանը չի համապատասխանում:
– Այս դեպքում հետևողական լինելո՞ւ եք, որ կեղծ ինֆորմացիա տարածողը հայտնաբերվի և պատասխանատվության ենթարկվի, որովհետև նա նաև Ձեր և մյուս պաշտոնյաների բարի համբավը արատավորելու փորձ է կատարել:
– Ես ինչ հետևողական լինեմ, որ նման բան չի եղել: Ոչ, ես ոչինչ չեմ ձեռնարկելու: Իսկ մյուս հարցերը դա արդեն իրավապահ համակարգի խնդիրն է, և նրանք պետք է զբաղվեն դրանով:
– Միջադեպից դուրս Գյումրին քրեականացված քաղաք է, և հիմնականում պաշտոնյաների որդիների հետ են նման միջադեպեր կատարվում: Դա Գյումրիի առանձնահատկությո՞ւնն է: Կարելի՞ է ասել դա նրանից է, որ Վարդան Ղուկասյանը սերտ հարաբերությունների մեջ է քրեական աշխարհի հետ, թե՞ այլ պատճառներ կան:
– Ես համաձայն չեմ, որ Գյումրին քրեական հանցագործություններով է հայտնի: Գյումրիում նման խնդիրներ չկան:
– Բոլորովին վերջերս Վարդան Ղուկասյանի որդու հետ կապված նոր միջադեպ արձանագրվեց: Մի՞թե սա վերը նշվածի ապացուցը չէ կամ այդ դեպքերից մեկը չէ:
– Ես նման դեպքերի ծանոթ չեմ: Նման ինֆորմացիայի չեմ տիրապետում,:
– Մի ժամանակ ասում էին, որ Ձեր և Վարդան Ղուկասյանի հարաբերությունները լարված են: Այսօր դրության տերը Գյումրիում ո՞վ է:
– (Ծիծաղում է) Ի՞նչ է նշանակում, թե իմ ու Վարդան Ղուկասյանի հարաբերությունները լարված են: Նման բան չկա: Կամ ի՞նչ է նշանակում` ով է դրության տերը: Մենք յուրաքանչյուրս ունենք մեր պարտականությունները, և յուրաքանչյուրս մեր մասով պատասխանատու ենք: Այնպես որ` Գյումրիում ամեն ինչ նորմալ է, և քաղաքը զարգանում է իր բնականոն հունով:
– Ձեր անձի շուրջ մի շարք լեգենդներ կան` կապված ձեր բիզնեսների և իրավապահ համակարգում ձեր գործունեության հետ: Մի քանի տարի է, որ դուրս եք եկել ոստիկանական համակարգից: Կողքից հետևելով ոստիկանության գործունեությանը` ինչպե՞ս եք գնահատում նրանց աշխատանքը: Ոստիկանապետ Ալիկ Սարգսյանի պաշտոնանկության դեպքում, եթե ձեզ առաջարկեն նրա պաշտոնը` կհամաձայնե՞ք:
– Ոստիկանության ներկայիս գործունեութունը շատ լավ եմ գնահատում: Ոստիկանությունը իր առաջ դրված խնդիրները կատարում է: Ինչ վերաբերում է պաշտոնանկությանը, դա ինչ հարց է, որ ինձ եք տալիս, այդ հարցով դիմեք իրավապահ համակարգին:
– Իսկ այդ պաշտոնը ձեզ առաջարկելու պահո՞վ:
– Ես նման հարցերի չեմ պատասխանում:
– «Գլենդել Հիլզի» կողմից իրականացված շինարարական աշխատանքներից հետո, երբ Սերժ Սարգսյանը այցելեց շահագործված շենք, նրա այցից հետո առաստաղը քանդվեց տանտերերի վրա: Այս շաբաթ Սերժ Սարգսյանը կրկին այցելեց Շիրակի մարզ և կարծես գոհ էր շինարարական աշխատանքներից: Կարելի՞ է ասել, որ շինարարական աշխատանքների հետ կապված թերությունները վերացվել են:
– Իհարկե: Շինարարական աշխատանքներն օր օրի որակապես ավելի են կատարելագործվում, հետևաբար նման խնդիրները առաջիկայում չեն կրկնվի: Դրանք արդեն անցյալում են: Նորից եմ կրկնում, որ շինարարական աշխատանքների որակը օր օրի կատարելագործվում է:
– Այն ուշադրությունը և ծախսերը, որը այսօր կառավարությունը և իշխանությունը կատարում են աղետի գոտու վերականգնման համար` Ձեզ, որպես մարզպետի, բավարարո՞ւմ են:
– Եկեք չասենք աղետի գոտի: Գյումրին արդեն աղետի գոտի չէ, այլ մի քաղաք, որը գտնվում է շինարարական աշխատանքների փուլում: Աղետի գոտի ասվածը այսօր արդեն չափազանցված կլինի: Իսկ կառավարության և իշխանության ծրագրերն ու իրականցված ծախսերը այս ուղղությամբ, բնականաբար, բավարարում են: Այսօր Գյումրիում առկա նոր շենքերը և իրականացվող շինարարությունը այդ ծրագրերի և ծախսերի արդյունքներն են:
– Այնուամենայնիվ, այդ ծրագրերի և ծախսերի ընթացքում իրականացվող աշխատանքները երկար տարիներ է, ինչ ընթացքի մեջ են: Դրանք ե՞րբ ավարտին կհասցվեն կամ կհասցվե՞ն, թե՞ ոչ:
– Իհարկե, սկսված ցանկացած աշխատանք ունի իր տրամաբանական ավարտը, որը որոշ դեպքերում երկար է տևում, որոշ դեպքերում` կարճ: Այս դեպքում այն խնդիրը, որը մենք ունեինք երկար տարիների աշխատանք էր պահանջում: Սակայն, ամենայն հավանականությամբ, այս ամբողջ աշխատանքները մինչև տարվա վերջ իրենց տրամաբանական ավարտին կհասցվեն:
