Երկուշաբթի Սիրիայի իշխանությունները հայտարարել են, որ երկրի ռազմաօդային ուժերը ռումբեր չեն նետել Համա մարզի Հալֆա քաղաքի վրա, իսկ պատահարի հետևանքով սպանված մի քանի տասնյակ մարդիկ դարձել են գրոհայինների հարձակման զոհ: Այս մասին հաղորդում է SANA սիրիական պետական գործակալությունը:
Սիրիայի իշխանությունները պնդում են, որ քաղաքի բնակիչների վրա հարձակվել են գրոհայինները, որոնք այնուհետև նկարահանել են դաժան հաշվեհարդարի հետքերը և մտադիր են խաղաղ քաղաքացիների մահվան մեջ մեղադրել կառավարական բանակին: Ընդ որում, կառավարական զորքն իրականում մասնակցել է մարտական բախումներին, սակայն փորձել է միայն կանգնեցնել ահաբեկիչներին:
Ավելի վաղ արևմտյան մի շարք ԶԼՄ-ներ, վկայակոչելով իրավապաշտպաններին և Սիրիայի ընդդիմադիրներին, հաղորդել էին, որ նախագահ Բաշար Ալ-Ասադի ռազմաօդային ուժերը Հալֆա քաղաքում կրակ են բացել մարդկանց վրա, որոնք հերթի են կանգնած եղել հացի խանութի մոտ, ինչի հետևանքով զոհվել են հարյուրավոր մարդիկ: