Դեռևս կառուցման փուլում գտնվող խոշորագույն ALMA միջազգային աստղադիտարանի աստղագետները գործարկել են սուպերհամակարգիչ, որը կհամակարգի ալեհավաքների աշխատանքը: Այս մասին հայտնում է Lenta.ru-ն՝ հղում անելով աստղադիտարանի կայքին:
Սուպերհամակարգիչը թույլ է տալիս աստղադիտարանի բոլոր ալեհավաքներին, որոնց թիվը շինարարության ավարտին պետք է կազմի 64, աշխատել մեկ մեծ ինտերֆերոմետրի ռեժիմում:
Հաշվողական սարքն անհրաժեշտ է ալեհավաքների ֆազային տարբերության հիման վրա ռադիոազդանշանի աղբյուրի դիրքը պարզելու համար: Սա համակարգչի թերևս միակ գործառույթը չէ:
ALMA-ի սուպերհամակարգիչը վայրկյանում 17 կվադրիլիոն գործողություն է կատարում: Համեմատության համար նշենք, որ գոյություն ունեցող ընդհանուր նշանակության ամենահզոր սուպերհամակարգիչ Titan-ը կատարում է վայրկյանում 17.6 կվադրիլիոն գործողություն:
Աստղադիտարանը տեղակայված է Չիլիի Ատակամա անապատում՝ ծովի մակերևույթից 5000 մետր բարձրության վրա: ALMA-ի շինարարության ավարտը ծրագրված է 2013-ի մարտին: