Տնտեսագետ, Երևանի նախկին քաղաքապետ Վահագն Խաչատրյանը գտնում է, որ մենք կարող ենք էլեկտրաէներգիայի այլընտրանքային աղբյուրներ գտնել` նոր ատոմակայան չկառուցելու համար:
Անդրադառնալով Վրաստանի նախկին նախագահ Էդուարդ Շևարդնաձեի հայտարարությանը, թե ՀՀ ատոմակայանը անվտանգության ոչ մի երաշխիք չունի` նա ասաց, որ վրացիների անհանգստությունը հիմքեր ունի:
«Աշխարհի վերաբերմունքը ատոմակայանների նկատմամբ գրեթե 180 աստիճանով փոխվեց Ճապոնիայի դեպքերի հետ կապված: Գերմանիան, որի ատոմակայանները շատ ավելի անվտանգ են, նման քայլերի է դիմում, այնպես որ` մեր ատոմակայանի նկատմամբ վերաբերմունքը կարող է փոխվել:
Հետևաբար պետք է ուշադրություն դարձնել այլընտրանքային աղբյուրներին, օրինակ` արևային կայաններին:
Այսօր աա շատ հեռանկարային է աշխարհում: Արևային կայանները տեխնիկական պարամետրերով կարող են նույնիսկ չզիջել ատոմակայաններին և ջերմաէլեկտրակայաններին, պարզապես խնդիրը էներգիայի կուտակման մեջ է` կապված եղանակային պայմանների հետ:
Սա ինձ թվում է Հայաստանի համար կարող է լինել լավագույն լուծում նոր ատոմակայանի փոխարեն»,- ասաց Վ.Խաչատրյանը: