Տրանսպորտի և կապի նախարար Գագիկ Բեգլարյանի եղբայրը` Հակոբ Բեգլարյանը, մոտ երկու ամիս առաջ վարչապետ Հովիկ Աբրահամյանի որոշմամբ նշանակվեց ՀՀ քաղաքաշինության նախարար Նարեկ Սարգսյանի տեղակալ` այդ պաշտոնում փոխարինելով Ազգային միաբանություն» կուսակցության ներկայացուցիչ Ալեքսանդր Կարապետյանին:
Ոչ վաղ անցյալում Հակոբ Բեգլարյանը զբաղեցում էր Պետական գնումների գործակալության պետի պաշտոնը, որից ազատվեց այն բանից հետո, երբ 2 տարի առաջ կառավարության նիստում Սերժ Սարգսյանը խիստ դժգոհություն հայտնեց գնումների գործընթացից՝ հիմնվելով նախագահի վերահսկողական ծառայության բացահայտումների վրա:
Այսօր կառավարությունում քաղաքաշինության նախարար Նարեկ Սարգսյանի ասուլիսի վերջում նախարարից հետարքրքվեցինք, թե ինչպես է գնահատում իր նոր տեղակալի աշխատանքը՝ հատկապես հաշվի առնելով, որ նա քաղաքաշինության ոլորտի մասնագետ չէ եւ հիշեցնելով, թե ինչպես Բեգլարյանը հեռացավ գնումների գործակալությունից:
«Շատ ակտիվ աշխատում է ինձ մոտ: Կան ոլորտներ, որոնք որ նրան տրված են, կարող եմ ասել շատ պատասխանատու, ակտիվ է եւ նույնիսկ կարող եմ ասել՝ բավական սիրված անձնավորություն է նախարարությունում»,-վստահեցրեց Նարեկ Սարգսյանը: Մեր դիտարկմանը, թե դա բավարա՞ր է փոխնախարար աշխատելու համար, Նարեկ Սարգսյանը խուսափողական պատասխան տվեց. «Մենք չենք կարողանում իրար հասկանալ: Ես ասացի պրոֆեսիոնալ է: Նա գնումների գործակալությունում երկար տարների աշխատել է»: Հետաքրքրվեցինք, թե հիմա Բեգլարյանը գնումնե՞ր է կատարում նախարարությունում, Սարգսյանն ասաց. «Գնումներ չի կատարում: Հիմա համակագում է պետական ծառայողներին մատչելի բնակարաններով ապահովելու ծրագիրը: Նորմալ աշխատում է»:
Դիտեք տեսանյութը:
