«Առաջին լրատվական»-ի զրուցակիցն է Հայաստանի Հանրապետությունում Ֆինլանդիայի արտակարգ և լիազոր դեսպան Քրիստեր Միխելսոնը:
– Պարոն Միխելսոն, առաջիկայում նախատեսվում է Հայաստանի անդամակցությունը Մաքսային միությանը, հետագայում նաև՝ Եվրասիական տնտեսական միությանը, սակայն երեկ ՀՀ նախագահ Սերժ Սարգսյանը ևս մեկ անգամ վերահաստատեց Հայաստանի վճռականությունը՝ զարգացնելու Եվրամիության հետ հարաբերությունները հնարավոր բոլոր ուղղություններով: Հաշվի առնելով այն, որ Ֆինլանդիան Եվրոպական միության ակտիվ երկրներից մեկն է, ինչպե՞ս է աջակցել Հայաստանին իր այս հանձնառության հարցում:
– Դուք գիտեք, որ Հայաստանն ու Ֆինլանդիան երկկողմ սերտ հարաբերություններ ունեն: Իսկապես՝ Ֆինլանդիան ԵՄ ակտիվ երկիր է, սակայն Հայաստանը որոշում է կայացրել Խորը և համապարփակ ազատ առևտրի գոտու պայմանագիրը չվավերացնելու մասին՝ ցանկանալով շարունակել աշխատանքը Եվրոպական միության հետ այն ոլորտներում, որոնք համատեղելի են իր ներկայիս ընտրության հետ: Մենք հարգում ենք Հայաստանի այս որոշումը: Այնուամենայնիվ, ես կարծում եմ, որ մենք դեռ կտեսնենք, թե որ ոլորտներում Հայաստանը կարող է շարունակել համագործակցությունը Եվրոպական միության հետ, և Ֆինլանդիան կաշխատի հենց այդ ուղղությամբ, երբ համագործակցության ոլորտները հստակեցվեն: Այսօր մենք մասնակցում ենք Եվրոպական միության Թվինինգ ծրագրի մեկնարկի միջոցառմանը, որը չափազանց լավ օրինակ է այն բանի, թե որ ոլորտներում Հայաստանն ու Եվրոպական միությունը կարող են շարունակել համագործակցությունը:
– Ինչպես նշեցիք, Հայաստանը ցանկանում է Եվրոպական միության հետ շարունակել քաղաքական հարաբերությունները՝ առանց առևտրային բաղադրիչի, բացի պարզապես ոլորտային համագործակցությունից՝ հնարավո՞ր են քաղաքական մակարդակի հարաբերություններ:
– Ես կարծում եմ, որ «կամ-կամ»-ի հարց չկա այստեղ: Հայաստանը Եվրոպայի մի մասն է, հարևանության երկիր է, Արևելյան գործընկերության անդամ երկիր է ու մենք անհամբեր սպասում ենք, թե ինչ է հնարավոր անել ապագայում:
– Պարոն դեսպան, շատ միջազգայնագետներ պնդում են, որ Եվրոպական միությունը պետք է վերանայի Արևելյան գործընկերության քաղաքականությունը: Ինչպիսի՞ն, ըստ Ձեզ, պետք է լինի այդ նոր քաղաքականությունը և ի՞նչ տեղ կհատկացվի Հայաստանին:
– Սա շատ ծավալուն թեմա է. եթե ընդհանուր փորձենք խոսել, ապա ես կարծում եմ, որ ամենաօպտիմալ տարբերակը Արևելյան գործընկերության յուրաքանչյուր երկրի համար առանձին ճանապարհ գտնելն է: Եվրոպական միությունը սա դիտարկում է որպես հնարավոր տարբերակ, ու ըստ իս՝ սա ամենապրակտիկ մոտեցումն է:
Առաջարկում ենք մանրամասներին ծանոթանալ տեսանյութի միջոցով:
