Amnesty International միջազգային իրավապաշտպան կազմակերպությունը հրապարակել է մի զեկույց, որը վերաբերում է աշխարհում մահապատիժների խնդրին: Ըստ այդ զեկույցի` նախորդ տարվա համեմատ 2010 թ. մահապատիժները կրճատվել են:
Դրանց ընդհանուր թիվը հասել է 527-ի, ինչը 25%-ով պաակս է, քան նախորդ` 2009 թ. (714 մահապատիժ): Amnesty International-ի տվյալներով` ամենաշատ մարդ մահապատժի է ենթարկվել Իրանում` 252 դեպք, ապա նրան հետևում են Հյուսիսային Կորեան` 60 դեպք, Եմենը` 46 դեպք, ԱՄՆ-ն` 46 դեպք, Սաուդյան Արաբիան` 27 դեպք:
Այս զեկույցում, սակայն, ներառված չեն Չինաստանի թվերը, որտեղ մահապատիժների մասին տեղեկությունները խիստ գաղտնի են պահվում: Սակայն իրավապաշտպան կազմակերպությունների տվյալներով` այդ երկրում տարեկան ավելի քան 1000 մարդ կախաղան է հանվում կամ գնդակահարվում: Իրավապաշտպանները նաև տեղեկացնում են, որ այս առումով Չինաստանում կարող է որոշակի բարելավում լինել, քանի որ 13 հոդվածներով մահապատիժը իբրև պատժամիջոց հանվել է:
Amnesty International-ը նաև նշում է այն ձևերը, որոնք առավել տարածված են մահապատիժն իրականացնելիս` գլխատում, կախաղան, էլեկտրական աթոռ, ինչպես նաև մահաբեր ներարկումներ: Հազվադեպ չի նաև գնդակահարման միջոցով մահապատժի իրականացումը: Մուսուլմանական երկրներում շատ տարածված է նաև քարկոծմամբ մահապատժի ենթարկելը, սակայն նախորդ տարի այդ ձևով որևէ մեկին կյանքից չեն զրկել:
