Բրիտանացի երգչուհի Ադելի Someone Like You երգը ճանաչվել է 2012թ. գլխավոր կարաոկե-հիթ: Այս մասին հաղորդում է Sky News հեռուստաալիքը` վկայակոչելով Lucky Voice կարաոկե-համակարգերի հաղորդագրությունը:
Lucky Voice-ի աշխատակիցների վերլուծության համաձայն` ընկերության կայքում ներկայացված ավելի քան 3 միլիոն երգերից օգտատերերի 7.4%-ն ընտրել է Someone Like You երգը:
Շատ քննադատների կարծիքով` տվյալ երգը դարձել է առաջին հիթը, որը բացի դաշնամուրից և վոկալից` ուրիշ ոչինչ չի պարունակել: Օգտատերերի ընտրությանը հավանաբար նպաստել է նաև այն փաստը, որ այս երգի համար Ադելը ստացել է Գրեմմի մրցանակ` «փոփ-ստեղծագործության լավագույն մենակատարում» անվանակարգում:
Lucky Voice-ի ամենահայտնի կարաոկե հիթերի եռյակի մեջ ներառել է նաև կանադացի երգչուհի Կարլի Ռեյ Ջեփսենի Call Me Maybe (5.4%) և One Direction փոփ-խմբի What Makes You Beautiful (4.2%) երգերը:
Առաջին տասնյակում ներառվել են Ադելի ևս երկու ստեղծագործություններ` Rolling In The Deep և Make You Feel My Love:
Lucky Voice-ի թոփ տասնյակում տեղ են գտել հետևյալ ստեղծագործությունները` Queen-ի Bohemian Rhapsody-ն, Ջոն Բոն Ջովիի Livin’ On A Prayer-ը, ամերիկյան Journey ռոք-խմբի Don’t Stop Believing-ը:
