««Օգնիր դպրոցիդ» էլեկտրոնային կայքի միջոցով յուրաքանչյուր անհատ իր հնարավորությունների սահմաններում պետք է օժանդակի իր հարազատ դպրոցին»,- նշել է Երևանի քաղաքապետ Կարեն Կարապետյանը հերթական աշխատանքային խորհրդակցության ժամանակ, ավելացնելով, որ այսօր դպրոցը դրա կարիքը շատ ունի և ցանկացած կամավոր նվիրատվություն կնպաստի կրթօջախների վիճակի բարելավմանը:
Անդրադառնալով մայրաքաղաքի երթևեկության կառավարման ու կանոնակարգման հիմնահարցերին, քաղաքապետը կարևորել է Երևանում «<Անվտանգ քաղաք» ապահովելու գաղափարի իրագործումը: Այս համատեքստում հանձնարարվել է սահմանված ժամանակացույցի համաձայն ավարտել ծանրաբեռնված խաչմերուկներում և կանգառներում ճանապարհային տեսախցիկների տեղադրման աշխատանքները: Զեկուցվել է, որ Տիգրան Մեծ պողոտայում ուղևորատար տրանսպորտի կանգառագոտիների առանձնացման տեխնիկական նոր միջոցների տեղադրումը զգալիորեն փոխել է պատկերը: Ռետինե բարձիկներով առանձնացված գոտիներում տաքսիներ և այլ մեքենաներ այլևս չեն կայանում: Կարեն Կարապետյանը հանձնարարել է ներկայացնել նաև այլ փողոցներում նմանատիպ միջոցառումներ ձեռնարկելու առաջարկներ: Մայրաքաղաքի արդյունավետ կառավարման հարցում, քաղաքապետը կարևորել է առաջիկա մի քանի տարիների կտրվածքով համաքաղաքային բյուջեի կանխատեսելիությունը. «Մենք պետք է կարողանանք կանխատեսել, թե որքան պետք է լինի Երևան քաղաքի բյուջեն, որպեսզի մայրաքաղաքում լուծում ստանան, ինչպես հրատապ, այնպես էլ երկրորդական խնդիրները»,- նշել է Կարեն Կարապետյանը: Քաղաքապետը շեշտադրել է գույքահարկի, հողի հարկի, ինչպես նաև սանմաքրման համար գանձվող վարձավճարների հավաքագրումն ավելի արդյունավետ կազմակերպելու հարցը` առաջարկելով ճշտել և գնահատական տալ գույքային հարկերի բազային տվյալների մասով: Աշխատանքային խորհրդակցության ընթացքում մեկ անգամ ևս ուշադրություն է հրավիրվել շուկաներում և ստորգետնյա անցումներում սանիտարահիգիենիկ պատշաճ վիճակի ապահովման, Երևան քաղաքում կառուցապատողների կողմից շինարարության ժամկետների խախտման, մայրաքաղաքի վերելակային տնտեսության բարելավման, բազմաբնակարան շենքերի մուտքերի վերանորոգման և մի շարք այլ հարցերին: Երևանի քաղաքապետարան