Երևանի մամուլի ակումբի (ԵՄԱ) նախագահ Բորիս Նավասարդյանը « Առաջին լրատվական»-ի հետ զրույցում գնահատելով «Ա1+»-ի լրագրող Մհեր Արշակյանի և ԱԺ ՀՀԿ խմբակցության պատգամավոր Մհեր Սեդրակյանի (Թոխմախի Մհեր) միջև տեղի ունեցած միջադեպի շուրջ ստեղծված հասարակական և քաղաքական ուշադրությունը` կարծիք հայտնեց, որ Հանրապետական կուսակցության անդամներն իրենց հայտարարություններով ինչ-որ կերպ փորձում են հեռավորություն ստեղծել իրենց և Մհեր Սեդրակյանի միջև.
«Երկրի նախագահը ելույթ ունենալիս բավականին մեծ ուշադրություն դարձրեց այն հարցին, որ այսուհետ լրագրողների նկատմամբ ֆիզիկական բռնությունները պակասելու են: Պատգամավորի կողմից նման սպառնալիքները, այն էլ` այն պատգամավորի, որը նախագահի կողմից ղեկավարվող կուսակցությունից է, պետք է որ նախագահի ելույթի ներքո արձագանք լիներ:
Բնականաբար, նաև հասկանալի է. մոտենում են ընտրությունները, և քաղաքական ուժերը չէին ուզենա, որպեսզի առանձին գործիչների պատճառով ստվեր ընկներ տվյալ կուսակցության, քաղաքական ուժի վրա: Նրանք ուզում են ինչ-որ տեղ հեռավորություն ստեղծել իրենց և տվյալ դեպքում` Մհեր Սեդրակյանի միջև»:
Անդրադառնալով լրագրողների բուռն արձագանքին և քննադատություններին` Բորիս Նավասարդյանը նախ դրական գնահատեց այդ երևույթը, ապա նաև հավելեց, որ հենց այդ արձագանքների շնորհիվ է, որ արձագանքեցին նաև իշխող կուսակցության ներկայացուցիչները.
«Ինձ թվում է` այսօր հիմնական արձագանքների տիրույթը սոցիալական ցանցերն են: Այս դեպքում հասարակական և լրագրողական հանրության արձագանքը ադեկվատ էր, համարժեք. եթե այդ արձագանքը չլիներ, միգուցե նաև չլիներ Հանրապետական կուսակցության արձագանքը»:
Տեղեկացնենք, որ միջադեպից հետո ԱԺ փոխնախագահ, ՀՀԿ խմբակցության պատգամավոր Էդուարդ Շարմազանովը իր անունից ներողություն էր խնդրել, իսկ նույն կուսակցության պատգամավոր Մարգարիտ Եսայանն էլ
ներողություն էր խնդրել, որ այդ պահին այնտեղ չի եղել և անկարգին կարգի հրավիրելու հնարավորություն չի ունեցել:
Հիշեցնենք, որ լրագրող Մհեր Արշակյանը երեկ ԱԺ-ում մոտեցել էր ՀՀԿ պատգամավոր Մհեր Սեդրակյանին` հարց տալու նպատակով, սակայն վերջինս վիրավորել էր լրագրողին՝ սպառնալով կոտրել ծնոտը:
