«Ժառանգություն» խմբակցության մամլո խոսնակ Հովսեփ Խուրշուդյանն «Առաջին լրատվական»-ի հետ զրույցում, անդրադառնալով Gallup Organization–ի այսօրվա հրապարակած տվյալներին, ասաց, որ իրենք Gallup–ի հարցումներին լուրջ չեն վերաբերվում. «Նախ պետք է հասկանալ՝ այն կազմակերպությունը, որ իրեն Gallup է անվանում, որևէ կապ ունի՞ իսկական Gallup-ի հետ։ Ինձ համար դա հարցական է»:
Հովսեփ Խուրշուդյանից հետաքրքրվեցինք նաև, թե հնարավո՞ր է արդյոք ՀԱԿ-ի կողմից թեկնածու առաջադրելու դեպքում «Ժառանգություն»–ն ու ՀԱԿ-ը պայմանավորվեն և մի թեկնածուով պայքարեն Սերժ Սարգսյանի դեմ: Վերջինս պատասխանեց, որ իրենք «եթե»-ներով հարցերին չեն պատասխանում և ունեն իրենց թեկնածուն. «Ընդհանրապես մենք «եթե»-ներով մեկնաբանություն չենք տալիս, նման հարց «Ժառանգություն»-ում չի քննարկվում և մենք ունենք մեր թեկնածուն՝ Րաֆֆի Հովհաննիսյանը։ Նա առաջադրվելու է, և այդ մասին պաշտոնապես կհայտարարվի դեկտեմբերի 22-ի համագումարի ընթացքում:
Հիշեցնենք, որ ըստ Gallup Organization-ի հարցումների՝ ընտրողների 49 %-ը քվեարկելու է Սերժ Սարգսյանի, 21 %-ը՝ Գագիկ Ծառուկյանի, 6 %-ը՝ Լևոն Տեր-Պետրոսյանի, 5 %-ը՝ Րաֆֆի Հովհաննիսյանի, ևս 5 %-ը՝ Ռոբերտ Քոչարյանի, 3 %-ը՝ Վահան Հովհաննիսյանի օգտին, և 9 % կազմել են չկողմնորոշվածները:
Հարցվածների 39 %-ն ասել է, որ չի քվեարկի Լևոն Տեր-Պետրոսյանի, 16 %-ը՝ Արթուր Բաղդասարյանի, 12 %-ը՝ Ռոբերտ Քոչարյանի, 11 %-ը՝ Սերժ Սարգսյանի, 7 %-ը՝ Րաֆֆի Հովհաննիսյանի օգտին:
