Րոպեներ անց Կառավարության նիստերի դահլիճում «Հանրապետություն» կուսակցության ղեկավար Արամ Սարգսյանը կհայտարարի՝ առաջադրվելո՞ւ է գալիք նախագահական ընտրություններում, թե՞ ոչ: Կառավարության նիստերի դահլիճում հավաքվել են ոչ միայն կուսակցության համակիրները, այլև կուսակցության ղեկավար կազմի կողմից հրավիրված քաղաքական գործիչներ:
Ինչպես լրագրողների հետ ճեպազրույցի ընթացքում հայտարարեց «Հանրապետություն» կուսակցության ղեկավար Արամ Սարգսյանը՝ համագումարին հրավիրվել են բոլորը. «Հրավիրել ենք նաև ՀԱԿ-ից, ՀՀՇ-ից հրավիրել ենք Արարատ Զուրաբյանին, Դավիթ Շահնազարյանին. մեզ համար ՀՀՇ-ն դա է»:
Հարցին՝ եթե Լևոն Տեր Պետրոսյանը որոշի առաջադրվել, ո՞րը կլինի իր քայլը, Արամ Սարգսյանը պատասխանեց, որ ելույթում կա բոլոր հարցերի պատասխանը: Ադրադառնալով երեկ Հրանտ Բագրատյանի տարածած հայտարարությանը՝ Սարգսյանը նշեց, որ Բագրատյանի որոշմանը հարգանքով է վերաբերվում: Նա նշեց, որ դեմ է եղել ՀԱԿ-ի վարած քաղաքական կուրսին և դուրս է եկել: Դուրս գալուց իրենք հայտարարություն են արել և հայտնել իրենց դիրքորոշման մասին:
«Այսօրվա իրավիճակի պատասխանատուները հոկտեմբերի 27-ի և մարտի 1-ից հետո բոլոր այն ուժերն են, ովքեր համախմբվեցին իշխանությունների շուրջը՝ դրանով իսկ արդարացնելով այն և լեգիտիմացնելով: Ես ԲՀԿ-ի հետ համագործակցությունը համարել եմ ոչ իրատեսական և ոչ ճիշտ՝ քաղաքական առումով»,- հստակեցրեց Արամ Սարգսյանը:
Նշենք, որ «Հանրապետություն» կուսակցության համագումարին ներկա են «Ազատություն» կուսակցության նախագահ Հրանտ Բագրատյանը, «Ժառանգություն» կուսակցության նախագահ Րաֆֆի Հովհաննիսյանը, «Ազատ դեմոկրատներ» կուսակցության անդամ Ալիկ Արզումանյանը, «168 ժամ» թերթի խմբագիր Սաթիկ Սեյրանյանը, քաղաքական գործիչ Աշոտ Մանուչարյանը, ՆԺԿ առաջնորդ Արամ Կարապետյանը, ՀԱԿ ներկայացուցիչ Պետրոս Մակեյանը և մի շարք այլ քաղաքական գործիչներ:
«Հանրապետություն» կուսակցության համագումարի օրակարգում նախատեսվում են մի շարք ելույթներ։ Կուսակցության քաղաքական խորհրդի հաշվետվությունն է ներկայացնելու կուսակցության ղեկավար Արամ Սարգսյանը, կուսակցության վերահսկիչ հնձնաժողովի հաշվետվությունը` Նորիկ Եղիազարյանը, այնուհետև տեղիէ ունենալու կուսակցության քաղաքական խորհրդի ընտրությունը, վերահսկիչ հանձնաժողովի ընտրությունը և կուսակցության վեցերորդ համագումարի բանաձևի ընդունումը:
Համագումարն ավարտվելու է ժամը 17.00-ին, որից հետո տեղի է ունենալու մամլո ասուլիս:
