Ֆիլիպիններում H-World աղանդի մոտ 500 ներկայացուցիչներ հավաքվել են Սուրիգաո քաղաքի մերձակայքում գտնվող բլրի վրա, որտեղ սպասում են «ապոկալիպսիսի» գալուն։ Այս մասին հաղորդում է Rosbalt-ը:
«Այդ օրը կտիրի մթությունը, իսկ մարդկանց սրտերը կկորցնեն հույսը»,- ասել է աղանդի 60-ամյա ղեկավար Բերանո Թամայոն: «Մեծն խավարից» հետո աշխարհում կսկսվեն տարերային աղետները, իսկ հետո կփոխվի աշխարհի կարգը: Ըստ նրա՝ բլուրը, որի վրա հավաքվել են, երաշխավորում է իրենց անվտանգությունը:
Աղանդավորները սկսել են Սուրիգաո տեղափոխվել դեռևս ամառվա կեսերից: Նրանք ապահովել են իրենց սնունդը` հավեր և խոզեր պահելով, դրա հետ մեկտեղ վարել են զրկանքներով լի կյանք, որպեսզի մաքրվեն մեղքերից:
Հիշեցնենք նաև, որ այսօր Չինաստանում հասրակական կարգը խախտելու համար ձերբակալվել են «Ամենակարող աստված» աղանդի 600 ներկայացուցիչներ, որոնք քարոզել են «աշխարհի վերջը»: