«Սերժ Սարգսյանը խոսեց թուրքական կողմի համար հասկանալի բառապաշարով»,- «Առաջին լրատվական»-ի հետ զրույցում ասաց ԵՊՀ արևելագիտության ֆակուլտետի փոխդեկան Ռուբեն Մելքոնյանը՝ անդրադառնալով ՄԱԿ-ի Գլխավոր ասամբլեայի 69-րդ նստաշրջանի ընթացքում Սերժ Սարգսյանի ելույթին:
Նա նշեց, որ բավական բարձր ու հեղինակավոր ամբիոնից տրվեց Թուրքիայի ապակառուցողական քաղաքականության՝ բավական կոպիտ և կոշտ շեշտադրումներով գնահատական: Ըստ նրա՝ այն, որ Թուրքիան տևական ժամանակ վարում է ապակառուցողական քաղաքականություն, շատերին է հայտնի, սակայն նման բարձր ամբիոնից դրա քննադատությունը և խնդիրների մանրակրկիտ ներկայացումը բավական կարևոր է և բնական:
«Նախագահի ելույթն ու արված շեշտադրումները հավասարազոր և համարժեք են Թուրքիայի վերջին 5 տարիների վարած քաղաքականությանը: Կարծում եմ, որ բավական հավասարակշռված և համարժեք ելույթ էր՝ ելնելով ստեղծված իրավիճակից»,- ասաց Ռուբեն Մելքոնյանը՝ շարունակելով, որ ելույթը մի կողմից՝ հարստացված էր փաստերով, մյուս կողմից՝ տարատեսակ հիմնավորումներով, երրորդ կողմից՝ արդարացված ու հիմնավորված քննադատությամբ՝ ուղղված և Ադրբեջանին, և Թուրքիային:
Նրա խոսքով՝ ելույթում քարոզչական և ոչ հիմնավորված երևույթներ, տարրեր չկային, ամբողջական փաստեր էին, որոնք բոլորը գիտեն, պարզապես նախագահը կարողացավ բարձր ամբիոնում ճիշտ ներկայացնել հավաքական կարծիքը: Սա, նրա գնահատմամբ, դրական է: Նա նշեց, որ գտնվում ենք մի փուլում, երբ ամեն ինչ ընթանալու է հայ-թուրքական արձանագրությունների հետկանչի ուղղությամբ. «Եվ նախագահի, և ԱԳ նախարարի ելույթների տրամաբանությունն ու էվոլյուցիան մեզ դա են հուշում»:
Թուրքագետն անդրադարձավ շատ քննարկումների առարկա դարձած «գրողի ծոցը վավերացնեք» արտահայտությանը՝ նշելով, որ Թուրքիայի նորընտիր նախագահ Էրդողանի հռետորաբանության մեջ բազմաթիվ նման և նույնիսկ շատ ավելի կոպիտ, փողոցային օրինակներ կան: Ուստի, նրա խոսքով, Սերժ Սարգսյանը թուրքական կողմի համար հասկանալի բառապաշարով խոսեց, թուրքական կողմի համար դա հասկանալի խաղի կանոն է:
«Երբեմն-երբեմն թուրքական կողմի հետ պետք է խոսել իրեն ընկալելի, իրեն ավելի հոգեհարազատ և հասանելի բառապաշարով»,- ասաց Ռուբեն Մելքոնյանը:
Առաջարկում ենք մանրամասներին ծանոթանալ տեսանյութի միջոցով:
