Nikon ընկերությունը արտոնագրային հայցում նկարագրել է այն համակարգը, որը թույլ է տալիս ժապավենային 35 միլիմետրանոց հայելային լուսանկարչական ապարատը վերածել թվայինի: Այս մասին հայտնում է Nikon Rumors բլոգը:
Համակարգն իրենից ներկայացնում է մատրիցայով և լուսանկարների վերամշակման համար նախատեսված պրոցեսորով էկրան, որը տեղադրվում է ապարատի հետևի կափարիչի տեղում: Ապարատի աշխատանքի ձևաչափը կարելի է կարգավորել պտուտակի միջոցով:
Nikon-ը հայցը Ճապոնիայի արտոնագրային մարմիններին է ներկայացրել դեռևս 2011 թվականի մայիսին: Հայցը հրապարակվել է 2012-ի դեկտեմբերի 10-ին: Նշենք, որ արտոնագրային հայցի ներկայացման փաստը չի երաշխավորում, որ ընկերությունը մշակումը կներմուծի կյանք:
Թվային ներդիրներ արդեն գոյություն ունեն, սակայն դրանք նախատեսված են միջին և խոշոր ձևաչափի տեսախցիկների համար: