Ամերիկացիների ավելի քան 50%-ն աջակցում է զենքի վաճառքի սահմանափակում հաստատելու գաղափարին, սակայն նրանք չեն հավատում, որ դա կօգնի դադարեցնել բռնությունը երկրում: Այս մասին վկայում են CNN հեռուստաընկերության կողմից պատվիրված հարցման արդյունքները:
Հետազոտության արդյունքների համաձայն՝ ամերիկացիների 52%-ը աջակցում է զենքի վաճառքի խիստ սահմանափակում սահմանելուն կամ զենք կրելու լիակատար արգելքին: Ինչպես նշում է CNN-ը, նման մարդկանց քանակը վերջին մի քանի տարվա մեջ առաջին անգամ գերազանցել է 50%-ը:
Հարցման մասնակիցների 53%-ը հայտարարել են, որ, չնայած իշխանությունների գործողություններին, ԱՄՆ քաղաքներում գնդակահարությունները շարունակվում են:
Հետազոտողների հարցերին պատասխանել է 620 ամերիկացի: Հարցումն անցկացվել է դեկտեմբերի 17-18-ը՝ Կոնեկտիկուտ նահանգի ողբերգությունից հետո, որտեղ 20-ամյա Ադամ Լանզան սպանել էր 27 մարդու (այդ թվում՝ 20 երեխայի):
Չորեքշաբթի ԱՄՆ նախագահ Բարաք Օբաման հայտարարել է հատուկ հանձնաժողով ստեղծելու մասին, որը ղեկավարելու է փոխնախագահ Ջոզեֆ Բայդենը: Հանձնաժողովի խնդիրն է երկրում բռնության մակարդակը նվազեցնելու առաջարկներ նախապատրաստելը:
