«Առաջին լրատվական»-ի հետ զրույցում բնապահպան Սիլվա Ադամյանը, խոսելով Խոսրովի արգելոցի հնարավոր նոր տնօրենի մասին, ասաց. «Խոսրովի արգելոցի տնօրենի հետ կապված գործընթացը անօրինական է. պետք է հայտարարվեր մրցույթ, և մենք էլ կառաջարկեինք այնպիսի մարդկանց, ովքեր տվյալ ոլորտի լավ մասնագետներ են»:
«Գիտական ինստիտուտներում շատ արժանի մարդիկ կան, ի՞նչ է նշանակում ամենուրեք կառավարության մարդկանց առաջ տանել. հո ամեն տեղ ծանոթով ու պաշտոնով չէ՞»,- ասաց նա:
Ս. Ադամյանի տեղեկություններով` Խոսրովի արգելոցի նոր տնօրեն կդառնա Հովիկ Աբրահամյանի մտերիմը, այդ պատճառով է նա դարձել տնօրենի ժամանակավոր պաշտոնակատար. «Այս հարցը մենք դեռ պատրաստվում ենք բարձրաձայնել, անթույլատրելի է, Հովիկ Աբրահամյանի մտերիմին չեն բրթելու առաջ»:
«Առաջին Լրատվական»-ի հետ զրույցում այս հարցի հետ կապված իր դժգոհությունը հայտնեց նաև «ԷկոԼուր» ՀԿ-ի տնօրեն Ինգա Զառաֆյանը. «Մենք նայում ենք մարդու «ՍՎ-ներին», բայց ոլորտի հետ կապված ոչինչ չենք տեսնում: Չենք ասում` այս մարդը մեզ դուր է գալիս կամ հակառակը, պարզապես ուզում ենք, որ արգելոցի տնօրենը մասնագետ լինի, համապատասխան կրթություն ունենա, իսկ նա ընդհանրապես ոչ համապատասխան կրթություն ունի, ոչ էլ մասնագետ է:
Միայն մի քանի տարի ոլորտում աշխատելը դեռ բավարար չէ՝ 15 տարի է, այդ մարդն ընդհանրապես դուրս է եկել այդ ոլորտից, ինչպե՞ս կարելի է նրան տնօրենի ժամանակավոր պաշտոնակատարի, իսկ հետագայում գուցե նաև հենց տնօրենի պաշտոնը վստահել: Բիզնես-ոլորտից են բերում, պարտադի՞ր է, որ ամեն տեղ բիզնեսի մարդիկ լինեն, ի՞նչ է, չկա՞ այլ մարդ: Այ, սա է հարցը: Այսինքն` նրանք խախտում են բոլոր իրավունքները»
Ինգա Զառաֆյանը շեշտեց, որ իր համար կապ չունի այդ մարդու անուն-ազգանունը, բնապահպանների համար կարևոր է միայն այն, որ մարդը ոլորտի լավ մասնագետ լինի. «Մենք նայում ենք մարդու «ՍՎ-ին», իսկ այս դեպքում այն ընդհանրապես չի համապատասխանում այդ պաշտոնին՝ մարդը չունի համապատասխան կրթություն: Եթե նա արդեն քանի տարի է` ոլորտից դուրս է, նա ինչպե՞ս կարող է ղեկավարել այդ միջավայրը: Ես ոլորտի լավ մասնագետների եմ ճանաչում, բայց թեկնածու չենք առաջարկում. դա նախարարության իրավասությունն է: Թող բարի լինեն` այդպիսի մի մարդու հրավիրեն, որը գոնե միայն «ՍՎ-ով» համապատասխանի»:
