Այս ընթացքում՝ մասնավորապես քաղաքացիական հասարակության շրջանակներից տեսակետ է հնչել, որ ճիշտ կլինի, եթե քաղաքական ուժերը բոյկոտեն առաջիկա նախագահական ընտրությունները: «Հայկական ժամանակ»-ը գրում է, որ ըստ այդ տեսակետի, առկա իրավիճակում ընտրություններին մասնակցելու ճանապարհով իշխանափոխությունն անհնար է, և պետք է գոնե բոյկոտի միջոցով չլեգիտիմացնել Սերժ Սարգսյանին: Կա, սակայն, նաև հակառակ տեսակետը, որ բոյկոտը ձև չէ, դա ավելի շատ ձեռնտու է իշխանություններին: Կա նաև տեսակետ, որ որոշ ուժեր, բոյկոտն օգտագործելով, փորձելու են այդ կերպ խուսափել ընտրություններում թեկնածու առաջադրելուց: Այս պահին, սակայն, որևէ քաղաքական ուժ դեռ չի հայտարարել առաջիկա նախագահական ընտրությունները բոյկոտելու հնարավորության մասին, թեև պարզվում է, օրինակ, դաշնակցությունն այդ տարբերակը քննարկել է: ՀՅԴ Գերագույն մարմնի փոխներկայացուցիչ Արսեն Համբարձումյանը թերթի հարցին՝ դաշնակցությունը քննարկե՞լ է ընտրությունները բոյկոտելու տարբերակը, և ի՞նչ տեսակետ ունի դրա վերաբերյալ, պատասխանեց. «Ընտրությունները բոյկոտելու տարբերակը միայն վերջին օրերին չէ, որ քննարկվում է: Դա քննարկվել է տարբեր ձևաչափերով, ՀՅԴ-ն իր քննարկումների ժամանակ տարբեր սցենարներ նկատի ունեցել է, մենք որևէ տարբերակ չենք բացառում, բայց որոշումը կկայացնի կուսակցության Գերագույն ժողովը»:
Ըստ ԳԱ փոխներկայացուցչի, այդ տարբերակով առաջնորդվելու դեպքում՝ հարկ է նկատի ունենալ, թե ինչ արդյունավետություն կարելի է ակնկալել, որովհետև բոյկոտն ինքնանպատակ չպիտի լինի: «Բոյկոտը, ըստ էության, նշանակելու է լուրջ աշխատանք՝ քարոզչական, կազմակերպական, որովհետև դա պիտի նաև որոշակի դիրքորոշում ու տեսակետ ցույց տա: Բոյկոտ ասելով՝ մենք դա ենք հասկանում: Չմասնակցելը դեռ չի նշանակում՝ բոյկոտել ընտրությունները: Չմասնակցելը պասիվ կեցվածք է, բոյկոտելը ավելի լուրջ քաղաքական բովանդակություն և իմաստ ունեցող գործընթաց է, որը ենթադրում է համապատասխան դիրքորոշում, վերաբերմունք՝ ցույց տալու համար, որ Հայաստանում կայանալիք նախագահական ընտրությունները բացառում են իշխանափոխության հնարավորությունը, ինչը նշանակում է, որ ընտրություններին մասնակցելն անիմաստ է»,- ասաց Արսեն Համբարձումյանը:
