Այս պահին Հայաստանի Հանրապետությունում փակ է միայն Սելիմի լեռնանցքը, կան նաև դժվարանցանելի ճանապարհներ, որոնք մաքրելու աշխատանքները ներկայում ևս կատարվում են: Մասնավորապես, դժվարանցանելի են դեպի Ճամբարակ տանող անցումները` Բերդից և Սևանից, կան հատվածներ Շիրակի մարզում, Արագածոտնի մարզում, Դիլիջան-Սևան ավտոճանապարհին: Անդրադառնալով առատ տեղումների հետևանքով ճանապարհների անցանելիությանն ուղղված աշխատանքներին՝ այս մասին լրագրողների հետ հանդիպմանը ասաց ԱԻՆ ճգնաժամային կառավարման կենտրոնի պետ Հովհաննես Խանգելդյանը:
Նրա խոսքով՝ ձյան տեղումների հետևանքով վերոնշյալ ավտոճանապարհների դժվարանցանելիությունը ամբողջ օրվա ընթացքում կպահպանվի: Նա նկատեց, թե հաճախ ճանապարհները չմաքրելու տպավորություն է ստեղծվում, սակայն դա իրականությանը չի համապատասխանում, քանի որ «անընդհատ ձյուն է տեղում», ինչը խնդիրներ է առաջացնում ոչ միայն վարորդների, այլև «Ճանշին»-ի համար, որոնց տեխնիկան հաճախ հայտնվում է ձնաբքի մեջ:
«Ճանապարհների մաքրման խնդիրները լուծում է «Ճանշին»-ը: Այլ խնդիր է, որ հնարավոր է` ինչ-որ մի գյուղապետ պայմանագիր չի կնքել կազմակերպության հետ, ու միայն իր խղճին է մնում իր գյուղական բնակավայրի մաքրման աշխատանքները»,- ասաց նա:
Նա վարորդներին կոչ արեց մոտակա 10-15 օրում հնամաշ անվադողերով չընկնել ճամփա, ինչի հետևանքով այս տարի ավելանալու միտում ունի ճանապարհատրանսպորտային պատահարների թիվը` նախորդ տարիների համեմատ:
«Միայն այս տարվա ձմռան ամիսներին գրանցվել են 1700 ճանապարհատրանսպորտային պատահարներ»,- նշեց նա՝ խորհուրդ տալով երկար ճանապարհներ անցնելուց առաջ դիտել ԱԻՆ-ի կայքը, որտեղ թարմացվում է Հայաստանի ավտոճանապարհների անցանելիության վերաբերյալ տեղեկատվությունը:
Որպես վթարների թվի ավելացման պատճառ նա նշեց վարորդների անփորձությունն ու ձմռան գալուն անպատրաստ լինելը:
Հովհաննես Խանգելդյանը Երևանի մաքրման աշխատանքները համարեց «բավարար»: «Այնպես չէ, որ քաղաքը չի մաքրվում»,- նշեց բանախոսը:
