ԵԱՀԿ Մինսկի խմբի Ղարաբաղի հարակից տարածքներում հոկտեմբերին իրականացրած դաշտային առաքելության արդյունքներն ամփոփող փաստաթուղթն, ըստ Հայ ազգային կոնգրեսի արտաքին հարաբերությունների պատասխանատու Վլադիմիր Կարապետյանի, շատ վնասակար է Հայաստանի համար և կարող է բացասական հետևանքներ ունենալ հայկական կողմի բանակցային դիրքի վրա:
«Նախևառաջ «օկուպացված տարածքներ» արտահայտությունն անընդունելի է հայկական կողմի համար: Տարածքների նկարագիրը, որը կա զեկույցում, չի կարող պատիվ բերել որևէ երկրի, հատկապես այն երկրին, որը հռչակել է անկախություն և այդ տարածքները Սահմանադրությամբ ամրագրել է որպես սեփական տարածքներ»,- «Առաջին լրատվականի» հետ զրույցում կարծիք հայտնեց Վլադիմիր Կարապետյանը:
Կարապետյանը նկատեց, որ առավել մտահոգիչ է նաև այն, որ այս զեկույցը հնարավոր դարձավ պատրաստել հայկական կողմի միակողմանի զիջման արդյունքում.
«Անցել է շուրջ կես տարի և դիտարկման առաքելությունը չի գնացել Ադրբեջանի զավթած տարածքներ և անգամ մարտի 24-ին հրապարակած հայտարարության մեջ, երբ նշվում է, թե համանախագահները պետք է այցելեն տարածաշրջան, խոսք չկա Ադրբեջանի զավթած տարածքներ գնալու մասին, ինչն էլ մեկ անգամ ևս վկայում է, որ հայկական կողմը չհիմնավորված և միակողմանի զիջման է գնացել»:
Նշենք, որ Վիեննայում հրապարակված փաստաթուղթը դիտարկման համառոտ բովանդակությունն է, և ամբողջ զեկույցը դեռևս հրապարակային չէ, այն ներկայացվել է ԵԱՀԿ մշտական խորհրդում, բայց բոլոր դրույթներն առայժմ հրապարակված չեն:
Կարապետյանի կարծիքով, դեռևս չհրապարակված զեկույցը կարող է պարունակել դրույթներ, որոնք կարող են ավելի մեծ վտանգ պարունակել և էլ ավելի այլասերել Ադրբեջանին, որը կփորձի օգտվել ստեղծված իրավիճակից:
ՀԱԿ ներկայացուցիչը նաև նշեց, որ անհասկանալի է, թե ինչպես են ՀՀԿ-ականները դրական գնահատել ՄԽ զեկույցը.
«Այս զեկույցը միայն ադրբեջանցիներն էին դրական գնահատել, և փաստորեն նրանց կողքին կանգնել է «Հանրապետական» կուսակցությունը: «Օկուպացված տարածքներ» անվանումով և հարակից տարածքների վիճակին խայտառակ բնութագրում տվող զեկույցը դրական գնահատելը միայն ադրբեջանամետ քաղաքական գործչի մտքով կարող էր անցնել»:
