Մուհամմեդ մարգարեի մասին սերիալի բյուջեն ավելացել է` հասնելով 1 մլրդ դոլարի: Այս մասին հայտնում է Agence France-Presse-ը` հղում անելով ծրագրով զբաղվող Alnoor Holding կատարյան ընկերությանը: Այս մասին հայտնում է lenta.ru-ն:
Սերիալը կազմված կլինի 7 լիամետրաժ ֆիլմերից, ոչ թե 3` ինչպես ծրագրվել էր ավելի վաղ: Ֆիլմերն անգլերեն կնկարահանվեն, այնուհետ կթարգմանվեն մի շարք այլ լեզուներով:
Փորձագետների խումբը, որոնց շարքում է ամենաազդեցիկ սուննի իմամ Յուսուֆ ալ-Քարադավին, արդեն ավարտել է սերիալի սցենարի աշխատանքները` հայտարարել են Alnoor Holding-ի ներկայացուցիչները` չճշգրտելով, թե երբ են ծրագրում սկսել նկարահանումները:
Alnoor Holding-ը սերիալի մասին հայտնել է 2009-ին: Այն ժամանակ հայտնում էին, որ նախագծի պրոդյուսերը կլինի Բարի Օսբորնը: Ծրագրվում է աշխատանքներում ներգրավել հայտնի դերասանների, նաև` հոլիվուդյան: Սկզբում նախատեսվում էր ֆիլմի նկարահանումների վրա ծախսել 150 մլն դոլար:
Սերիալի սցենարի մասին մանրամասներ չեն հաղորդվում: Ստույգ հայտնի է, որ Մուհամմեդ մարգարեն այնտեղ չի երևա, քանի որ իսլամն արգելում է նրա ցանկացած պատկերում:
2012-ի սեպտեմբերին նկարահանվեց Մուհամմեդ մարգարեին ծաղրող «Մուսուլմանների անմեղությունը» փոքր բյուջեով ֆիլմը, որն իսլամական երկրներում հակաամերիկյան ալիք բարձրացրեց:
