Եմենի արտաքին գործերի նախարար Աբու Բաքր Աբդալլահ Ալ-Քիրբին այսօր հայտարարել է, որ Եմենում իշխանության փոխանցման պայմանների հարցը կարող է լուծվել արդեն այսօր: Այս մասին քիչ առաջ հաղորդել է Euronews հեռուստաալիքը:
«Հույս ունեմ, որ դա կլինի այսօր: Իշխանության փոխանցման ժամանակացույցը կքննարկվի, դա չպետք է խոչընդոտ լինի համաձայնություն ձեռք բերելու հարցում»,- Reuters գործակալությանն ասել է Ալ-Քիրբին:
Միայն 2013թ. հեռանալ ցանկացող Եմենի նախագահ Ալի Աբդալլահ Սալեհը ի վերջո զիջում է դիրքերը: Մի քանի օր առաջ նա հայտնել էր, որ կհեռանա 2012թ.-ի սկզբին, իսկ երեկ նշել էր, որ պատրաստ է հրաժարական տալ, սակայն դա կանի միայն խաղաղ պայմաններ լինելու դեպքում:
«Մենք պատրաստ ենք զիջումների` մտածելով այն մասին, որպեսզի եմենցիների արյունը չթափվի: Եվ ես պատրաստ եմ փոխանցել իշխանությունն ապահով, այլ ոչ թե հիվանդ ձեռքեր»,- ասել է Սալեհը: