Ադրբեջանական Turan լրատվական գործակալության փոխանցմամբ՝ նախորդ շաբաթ Ադրբեջանի իշխանությունները ձերբակալել են իրանցի վեց գործակալի, որոնք մտադիր էին ոչնչացնել ավելի վաղ Իսրայելից գնված անօդաչու թռչող սարքերը (ԱԹՍ): Այս մասին հայտնել է իսրայելական ռազմական շրջանակներին մոտ կանգնած Debka կայքը:
Ձերբակալվածների մոտ հայտնաբերվել են գումար, կեղծ անձնագրեր, ատրճանակներ, էլեկտրոնային սարքավորում՝ ինքնաթիռներին հետևելու և թռչող սարքերի խլացման համար: Հարցաքննության ժամանակ նրանք խոստովանել են, որ առաջադրանք են ստացել գրավել ԱԹՍ-երից մեկը, երբ այն թռիչք կգործեր Կասպից ծովի վրայով:
Այդ խմբի ձերբակալությունից հետո Ադրբեջանի իշխանություններն արգել էին երկիր մուտք գործել Բաքվում Իրանի դեսպանատանն աշխատող մշակութային կցորդին: Դեկտեմբերի 9-ին իրանական ԼԶՄ-ները տեղեկատվություն էին տարածել, որ ԱՄՆ-ն ու Իսրայելն Ադրբեջանի Աստարա շրջանում, որը սահմանակից է Իրանին, ակտիվացրել են հետախուզական գործունեությունը:
Իրանական աղբյուրների պնդմամբ՝ Hermes ԱԹՍ-երը լրտեսական օպերացիաներ են իրականացնում Իրանի սահմանին և ղեկավարվում են իսրայելական ռազմական արբանյակների կողմից:
Հիշեցնենք, որ մոտ մեկ շաբաթ առաջ Ադրբեջանի խորհրդարանը որոշում էր ընդունել չեղյալ հայտարարել Իրանի հետ սահմանի հատման պայմանների մեղմացումը, որն արվել էր երկու երկրների սահմանամերձ տարածքների քաղաքացիների համար:
Դրանով նախատեսվում էր, որ սահմանի հատման պայմանների դյուրացումը վերաբերելու է յուրաքանչյուր կողմից սահմանից մինչև 45 կիլոմետր հեռավորության վրա ընկած տարածքների բնակիչներին: Մեկնաբանելով տվյալ որոշումը՝ պատգամավոր Սիյավուշ Նովրուզովն ընդգծել է, որ իրենք պետք է իմանան, թե ով է մուտք գործում երկիր, որպեսզի ապահովեն անվտանգությունը:
