Apple կորպորացիան բանակցություններ է վարում Foursquare ընկերության հետ՝ քարտեզագրական ծառայության ինտեգրման նպատակով: Այս մասին հայտնում է The Wall Street Journal-ը՝ հղում անելով իր աղբյուրներին: Դա թույլ կտա Apple-ի օգտատերերի գտնվելու վայրի մասին տվյալներ ներառել հավելվածում: Աղբյուրների փոխանցմամբ՝ բանակցություններն անցկացվում են արդեն մի քանի շաբաթ: Դրանց մասնավորապես մասնակցում է Apple-ի ավագ փոխտնօրեն Էդդի Քյուն:
Apple-ի կարծիքով՝ Foursquare-ի հետ համագործակցությունը ընկերությանը կօգնի բարելավել քարտեզագրական ծառայությունը, որն ընկերությունը թողարկել է 2012-ի սեպտեմբերին: Foursquare-ի բանակցությունների մասին հայտնի դարձավ այն բանից հետո, երբ Google ընկերությունը App Store-ում նոր Google Maps հավելված թողարկեց: Հավելվածը շատ պահանջված էր: Ընդամենը մի քանի օրում այն ներբեռնել է ավելի քան 10 մլն մարդ:
Մայիսին Apple-ը հայտարարել էր, որ հրաժարվում է մրցակցի քարտեզներից, և դրանք կփոխարինի սեփական արտադրանքով:
Սեպտեմբերի 21-ին` վաճառքում հայտնված նոր սմարթֆոնների ձեռք բերումից հետո, շատ սպառողներ բողոքել էին քարտեզներում տեղ գտած անճշտությունների պատճառով:
