Այսօր ԱԺ նախագահ Հովիկ Աբրահամյանի մոտ տեղի է ունեցել խորհրդակցություն` կապված ԱԺ Կանոնակարգ-օրենքում Դավիթ Հարությունյանի և Արփինե Հովհաննիսյանի առաջարկած այն փոփոխության հետ, որով առաջարկվում է նորաստեղծ Էթիկայի հանձնաժողովում հավասարեցնել ընդդիմադիր և իշխանական անդամների քանակը:
Հիշեցնենք, որ այս պահին Էթիկայի հանձնաժողովը ունի 6 անդամ` մեկական անդամ յուրաքանչյուր խմբակցությունից: Օրինագծի հեղինակներն առաջարկում են հանձնաժողովում ավելացնել ևս երկու անդամ ՀՀԿ-ից և ՕԵԿ-ից:
Երեկ օրինագծի քննարկումն ԱԺ-ում շատ բուռն անցավ, այդ պատճառով էլ Հովիկ Աբրահամյանը ընդդիմության պատգամավորներին հրավիրել էր իր մոտ լսելու նրանց առաջարկները: Խորհրդակցությունից հետո ՀՅԴ պատգամավոր Արծվիկ Մինասյանը «Առաջին լրատվական»-ի հետ զրույցում ասաց, որ իրենք առաջարկել են փոփոխությունների նախագծից հանել ընդդիմություն և ոչ ընդդիմություն, իշխանական և ոչ իշխանական տերմինները և հանձնաժողովը կազմելու մեխանիզմը մնա գործող մեխանիզմի համաձայն` յուրաքանչյուր խմբակցությունից մեկական անդամ: Պատգամավորը նաև ավելացրեց, որ իրենք առաջարկել են հանձնաժողովի նախագահությունը ստանձնել ռոտացիոն կարգով` մեծ խմբակցությունից փոքր խմբակցություն, այսինքն` հանձնաժողովը նախագահելու իրավունք ունենան ԱԺ բոլոր վեց խմբակցությունները, այժմ այդ իրավունքն ունեն ընդդիմադիր և իշխանական մեծ խմբակցությունները ՀԱԿ-ը և ՀՀԿ-ն:
Արծվիկ Մինասյանն ասաց, որ եթե իշխանությունները չեն ցանկանում քաղաքականացնել Էթիկայի հանձնաժողովի աշխատանքները պետք է առաջին և երկրորդ ընթերցումների միջև ընկած ժամանակահատվածում ընդունեն այս առաջարկությունները: Մինչդեռ Դավիթ Հարությունյանի և Արփինե Հովհաննիսյանի` երեկ քննարկվող օրինագիծը այսօր կդրվի քննարկման և ամենայն հավանականությամբ կընդունվի: