Քառյակի հանրահավաքը լինելու է 1001-րդը՝ ֆորս-մաժորի նախադրյալ չկա: «Առաջին լրատվական»-ի հետ զրույցում նման տեսակետ հայտնեց քաղաքական և ընտրական տեխնոլոգիաների փորձագետ Արմեն Բադալյանը՝ անդրադառնալով ԲՀԿ ներկայացուցիչների դիտարկումներին, թե հնարավոր են ֆորս-մաժորային զարգացումներ, որին ԲՀԿ-ն պատրաստ է:
Արմեն Բադալյանն ասաց, որ Հայաստանում ընդհանրապես չի տեսնում ֆորս-մաժորի նախադրյալ, իսկ դրա միակ պատճառն այն է, որ Հայաստանի հասարակության կամ բնակչության զգալի մասը ցանկանում է արտագաղթել, իսկ արտագաղթող բնակչությունը ֆորս-մաժոր չի ստեղծում:
Ըստ նրա՝ հանրահավաքներ կարող են անցկացվել, ինչպես անցկացվել են վերջին քսան տարվա ընթացքում, երբ մոտավորապես 1000 հանրահավաք է եղել, իսկ նախատեսվող հանրահավաքը կլինի 1001-րդը, որովհետև նախադրյալներ չկան, թե այն կարող է քաղաքական ինչ-որ լուրջ թեժացման նախասկիզբ լինել: Պատճառը նորից այն է, որ թե՛ երկրի ներսում, թե՛ երկրից դուրս դրա համար պատճառներ չկան:
«Երկրի ներսում հասարակությունն այլևս չի հետաքրքրվում այս երկրի ապագայով, իսկ երկրից դուրս, մասնավորապես՝ Ռուսաստանում, ՌԴ իշխանությունները ստանալիքներ ունեն, մասնավորապես՝ այս հոկտեմբերի 10-ին նախատեսվելիք ԵՏՄ անդամակցության ստորագրման արարողությունը, իսկ քանի որ ակնկալում են ստորագրություն, ձեռնտու չէ իշխանափոխություն կազմակերպել: Եվ քանի որ թե՛ երկրի ներսում, թե՛ երկրից դուրս ակնկալիքներ չկան, ապա հանրահավաքի թեմաներից մեկը կարող է լինել այն, ինչ նրանք առաջարկել են՝ 12 կետերը:
Կլինի հանրահավաք, կխոսեն 12 կետերի մասին, բնականաբար՝ կասեն, որ այդ կետերը չեն կատարվել կամ ընդամենը մի մասն է կատարվել, կամ մասամբ է կատարվել, որի մասին կգրեն լրագրողները, կխոսեն քաղաքական գործիչները և՝ վերջ»,- ասաց Արմեն Բադալյանը:
Նա հավելեց, որ քառյակը, որպես քաղաքական ուժ, չի ընդունում ներկայիս իշխանությանը, ցանկանում է, որպեսզի իշխանափոխություն լինի, սակայն ՀՀ ներքին ուժերով այլևս անհնար է անել իշխանափոխություն, իշխանափոխություն կարող է տեղի ունենալ միայն արտաքին ուժերի՝ Ռուսաստանի ցանկությամբ, իսկ Ռուսաստանն ընդհանրապես այնքան էլ չի խրախուսում բռնի իշխանափոխության հեռանկարը:
Առաջարկում ենք մանրամասներին ծանոթանալ մեր պատրաստած տեսանյութի միջոցով:
