«Օրեցօր հանրապետությունում իրավիճակը ծանրանում է բոլոր առումներով: Այս առումով խորհրդարանական ուժերը և այդ մարդիկ մասնակից են եղել մեծ վտանգի, որը երկրում տեղի է ունենում»,- «Առաջին լրատվական»-ի հետ զրույցում նման տեսակետ հայտնեց «Հայրենիք և պատիվ» կուսակցության, «Հակակոռուպցիոն» ՀԿ նախագահ Գառնիկ Մարգարյանը:
Նրա խոսքերով՝ քառյակը մինչ այսօր դրական ոչինչ չի արել․ «Ի՞նչ են արել երկրում իրավիճակ փոխելու համար. ինչպես կուզեն վաղը մեկնաբանեն՝ բայց սա ռեժիմի հետ պայմանավորված հերթական խաղերն են՝ հերթական տարին անցկացնել և Սերժ Սարգսյանին թույլ տալ մինչև ն ժամկետի ավարտը նախագահելու: Իմ սեփական գնահատականն այդպիսին է»,- ընդգծեց նա:
Մարգարյանի կարծիքով՝ Գագիկ Ծառուկյանը իշխանություններից տարանջատված չէ և չի կարող գնալ համակարգային փոփոխությունների․ «Համակարգային փոփոխությունը օդի պես անհրաժեշտ է: Ռոբերտ Քոչարյանը երկու ժամկետ է իր կողքին եղել, ահա Սերժ Սարգսյանն էլ երկրորդ ժամկետն է իր կողքին, և ի՞նչ են անելու՝ իհարկե ոչինչ: Ո՞վ պատասխան տվեց այն փաստերի համար, որ մարտի 1-ին Ծառուկյանի թիկնազորն այդքան զենք էր ստացել պաշտպանության նախարարությունից»:
Ինչ վերաբերում է երիտասարդ թոշակառու Ռոբերտ Քոչարյանի հնարավոր վերադարձին քաղաքականություն, Գառնիկ Մարգարյանն ասաց․ «Երբ այդ նույն հեռուստաալիքը ֆիլմ է ցուցադրում և գովերգում է՝ էլ ի՞նչ կասկածես: Ռոբերտ Քոչարյան կամ մեկ այլ չինովնիկ, որ սխալներ, հանցանքներ ու զանցանքներ է գործել, դեռ նպատակ է հետապնդում վերադառնալու քաղաքականություն և, ինչու չէ, զբաղեցնելու բարձր պաշտոններ: Սա այն պատճառով է, որ վերջին քսան տարում Հայաստանում ոչ ոք պատասխան չի տվել կատարած հանցանքի համար, ինչպես Ռոբերտ Քոչարյանը պատասխան չտվեց հոկտեմբերի 27-ի համար, նա էր ոչ հայկական սահմանադրության գարանտը երկրում, ով է պատասխան տալու Պողոս Պողոսյանի սպանության համար: Քանի դեռ երկրում օրենքի առաջ պատասխան չեն տալիս նրանք, ովքեր թույլ են տալիս հանցանքներ, երկրում կարգուկանոն չի լինի: Դրա համար նրա ձեռքերը ազատ են, որովհետև թալանածի համար պատասխան չի տվել»:
Հարցազրույցն ամբողջությամբ՝ մեր տեսանյութում։
